Премиерот Заев и претседателката на ЕБОР, Рено-Басо, денеска на виртуелна церемонија потпишаа меморандум за разбирање
Со поддршка на сет мерки за политички ангажман, со техничка помош и инвестиции, Европската банка за обнова и развој (ЕБОР) ќе го поттикнува приближувањето на земјава кон Европската Унија.
За таа цел денеска, на виртуелна церемонија, премиерот Зоран Заев и претседателката на ЕБОР, Одил Рено-Басо, потпишаа меморандум за разбирање.
Соработката, според меморандумот, ќе се фокусира на три области – зајакнување на конкурентноста на приватниот сектор и инклузивен раст, на одржлива инфраструктура и транзиција кон зелена економија. Владата и ЕБОР ќе соработуваат и во подобрување на инвестициската клима, промовирање на меѓуграничната трговија и инвестиции и соработка со претпријатијата во државна сопственост од енергетиката и инфраструктурата.
„Охрабрени сме од чекорите што Северна Македонија ги прави во нејзиното пристапување кон ЕУ и ни претставува задоволство да ги поддржиме овие витални напори со нашиот придонес. Во овие времиња кои бараат поголем ангажман, поважно од кога било е со заеднички сили, не само да се справиме со моменталните предизвици, туку и да ги согледаме долгорочните цели на земјата“,
изјави претседателката на ЕБОР, Рено-Басо.
Премиерот Заев, како што соопштија од владината прес-служба, ја потенцирал важноста од реализацијата на приоритетите во меморандумот – владеењето на правото, намалувањето на корупцијата, зајакнувањето на транспарентноста и решавањето на прашањето со сивата економија, како предуслов за зголемување на инвестициската активност.
И покрај предизвиците и неизвесноста со пандемијата, заложбите на Владата на среден и на долг рок се преку системски мерки да се придонесе за севкупен економски раст.
Досега ЕБОР има инвестирано над 2 милијарди евра во 136 проекти во земјава.