Просечната возраст кај умрените од машки пол изнесува 71,9 години, односно 76,8 години кај лицата од женски пол или за 4,9 години е повисока просечната возраст кај жените
Бројот на умрени лица во земјава минатата година бележи раст од 0,1 процент. Повеќе умираат мажите и тоа во просек за 4,9 години порано од жените, а во над една третина од случаите причина за смртта се болести на циркулаторниот систем, покажуваат податоците од Државниот завод за статистика (ДЗС).
Најголем број смртни случаи – 2 010, се регистрирани во јануари, а најмалку – 1 518, во април.
Од вкупно 20 201 починат, поголем број 10 604 или 52,5 проценти се мажи, наспроти 9 597 или 47,5 отсто жени.
Просечната возраст кај умрените од машки пол изнесува 71,9 години, односно 76,8 години кај лицата од женски пол или за 4,9 години е повисока просечната возраст кај жените.
Умрени доенчиња се 47, а нивното учество е 0,2 отсто на 100 умрени лица.
Според Меѓународната класификација на болестите, најголемо учество во вкупно умрените лица имаат умрените од болести на циркулаторниот систем со 36,7 отсто, потоа неоплазмите со 19,6 отсто, ендокрините, нутритивните и метаболичките болести со 7,7 отсто, болестите на респираторниот систем се застапени со 4,1 отсто и следат останатите, но со помала застапеност.