Од ДЗС велат дека под целосна или делумна контрола се четири активни пожари на отворен простор
Целосно е изгаснат пожарот во атарот на селото Церово во Општина Желино кој синоќа се ширеше во насока на месноста Карпалак покрај автопатот Скопје-Тетово, информираат од Дирекцијата за заштита и спасување (ДЗС).
Во гаснењето на пожарот интервенирале територијалните противпожарни екипи од Тетово и Скопје.
Според директорот на ДЗС, Стојанче Ангелов, во текот на вчерашниот ден целосно се изгаснати 29 пожари на отворен простор.
Тој додава дека под целосна или делумна контрола се четири активни пожари на отворен простор.
Вчера, според Центарот за управување со кризи (ЦУК), во планинските предели на територија на Општина Желино – кај селото Мерово на Сува Гора и околу селото Церово на планината Жеден – беа евидентирани четири пожари кои синоќа беа ставени под контрола.
Директорот на ЦУК, Мухамед Али, рече дека состојбата внимателно се следи, но оти загрижува што одредени поединци со подметнување пожари ги загрозуваат природата и животите на граѓаните.
Сомнежи дека овие пожари се подметнати има и градоначалникот на Општина Желино, Блерим Сејдиу, кој на социјалните мрежи напиша оти пред неколку недели, веднаш откако во функција бил ставен булеварот во Желино, пожар избувнал кај Групчин и Церово, а оти вчера откако ги информирале граѓаните дека следуваат нови проекти за нив истовремено се случиле нови пожари на територијата на општината.