Граѓаните на Авганистан кои треба да стигнат во земјава нема да бидат попишани, затоа што има посебни протоколи за азиланти и за бегалци
Не сме институцијата што може да каже дека се одложува пописот. Ние имаме Закон за попис и единствена институција што може да каже такво нешто е Собранието, каде што, во таков случај, ќе треба да се направи измена на законот, изјави директорот на Државниот завод за статистика, Апостол Симовски, во гостување на Канал 5.
Државниот завод за статистика, нагласи Симовски, стои на тоа дека може да го спроведе попсиот и дека сите граѓани ќе бидат безбедени, бидејќи ќе се применуваат сите мерки предложени од Комисијата за заразни болести.
„Ќе ги почитуваме до максимум и во некои ситуации ќе одиме и над тоа. Примарно, ако сме на отворен простор, секој наш учесник нема никогаш да биде без маска и ќе инсистира и домаќинството да носи маска додека трае попишувањето. Второ, имаме посебни протоколи за таму каде што има заболени лица или лица во изолација. Имаме доволен период и да почекаме да излезат од таква состојба, па да направиме попис како што треба, а ако тоа не е можно има протокол како тоа да се направи со носење скафандер, ракавици и друга опрема“,
појасни Симовски.
Во однос на попишувачите, Симовски, нагласи дека една третина од пријавните веќе биле вакцинирани, а половина од останатите, рече, би се вакцинирале, доколку им биде организирана вакцинација.
„Имаме уште три дена за пријавување и пријавувањето на нови кандидати оди доста интензивно. За овој краток период имаме над 1 250 пријавени нови кандидати. На новото тестирање, кое ќе биде објавено, ќе имаат право да учествуваат и тие што биле пријавени на претходниот конкурс, а не дошле на тестирање од која било причина. Очекувам дека ќе имаме доволен број кандидати“,
изјави Симовски.
За методологијата, Симовски рече, дека е целосно прифатена од Евростат. Во однос на можноста за бојкот, тој нагласи, дека пописот не е само право, туку и законска обврска на сите граѓани.
„Ако некој одбие да биде попишан, а сите протоколи се испочитувани, тогаш ќе сноси последици. Законот предвидува прекршочна одговорност и тука нема пардон за никого“,
рече Симовски.
За тоа дали граѓаните од Авганистан, кои треба да пристигнат во земјава, ќе бидат попишани и ќе влезат во статистиката, Симовски одговори одречно и нагласи дека има посебен протокол за азиланти и за бегалци.