Поради разликите во вештачењата, судот нареди на следното рочиште да соочат психијатриските вештачења од одбраната и Обвинителството, односно двајцата психијатри да ги појаснат своите наводи. Потоа, судот ќе одлучи на кое вештачење ќе му поклони верба или ќе нареди ново психијатриско вештачење
Две различни психијатриски вештачења за состојбата на Раде Трајковски-Штекли беа соопштени на денешното судско рочиште за овој случај, во кој покрај првообвинетиот Штекли се обвинети уште деветмина за трговија со дрога.
Според вештачењето што го достави неговата одбраната, Штекли страда од растројство со шизофрени карактеристики, има халицинации и параноидни идеи и не е способен да ја следи судската постапка.
„Од пред три до четири години, Раде постепено се повлекува од околината, се изолира во домашна среди и почнува да се бави со медитација и други активности што ги толкува со заблуда. Има свој имагинарен учител, свето битие со огромна светост што го подучува на патот на вечниот живот. Поставил камери на живеалиштето и настаните во околината ги толкува на параноиден интерпретативен начин, тврдејќи дека албанската мафија се здружила против него и го полудуваат“,
се вели во психијатриското вештачење за Штекли што го доставила неговата одбрана.
Спротивно на тоа, Обвинителството изготвило психијатриско вештачење во кое се тврди дека тој апсихотичен, односно нема ментални проблеми и е способен да учествува во судската расправа.
Лекар од психијатриската болница во Бардовци смета дека Штекли може да го следи судеењето, дека расудувал и бил пресметлив.
Поради разликите во вештачењата, судот нареди на следното рочиште да соочат психијатриските вештачења од одбраната и Обвинителството, односно двајцата психијатри да ги појаснат своите наводи. Потоа, судот ќе одлучи на кое вештачење ќе му поклони верба или ќе нареди ново психијатриско вештачење.
На почетокот од денешното рочиште, четврица од обвинитетите признаа вина, како Бранискав Зајков, Данчо Масев, Владимир Веселиновски и Димитар Трајков, кои пресудата ќе ја слушнат утре попладне.
Следното рочиште за Штеекли и останатите петмина обвинети е закажано за 3 септември.
Обвинението против групата на Раде Трајковски-Штекли беше поднесено на крајот на мај годинава по истрагата на Основното јавно обвинителство за гонење организиран криминал и корупција (ОЈО ГОКК).
Тој и уште девет лица се товарат за продажба на марихуана и кокаин на територијата на Скопје.
Инаку, Трајковски беше приведен на 19 јануари годинава, а следниот ден му беше одреден и 30-дневен притвор, кој му беше продолжен по поднесувањето на обвинението.
Истрагата против групата на Штекли почна со 15 осомничени, за на крајот да стигне до 17 лица. Актуелната бројка од 10 лица во обвинителниот акт е затоа што во меѓувреме седум од осомничените се спогодија со Обвинителството и добија затворски казни од три до три години и шест месеци зависно од степенот на инволвираност во кривичните дела.
„Во периодот од јануари 2024 до јануари 2025 година обвинетите како повеќе лица се здружиле во криминална група која на територијата на Град Скопје се занимавала со неовластена трговија со наркотични дроги – кокаин и марихуана. Врз основа на прибавените докази во истражната постапка утврдено е дека групата била јасно структурирана и имала строго дефинирани улоги меѓу членовите – од набавка и складирање, до пакување, транспорт и продажба на дрогата. Дрогата била складирана во специјално изнајмени станови, а потоа во помали количини дистрибуирана и продавана на наркопазарот, по утврдени цени од 4.500 до 6.000 денари за грам кокаин и 200 до 300 денари за грам марихуана. Парите од продажбата се предавале на првообвинетиот, кој како награда дел од парите им давал на останатите обвинети, а воедно им давал и насоки за проширување на мрежата на препродавачи. Членовите на групата користеле мрежа на препродавачи и посредници од кои седуммина опфатени во овој предмет ја признаа вината и се спогодија со обвинителството и притоа добија затворски казни“,
соопштија од ОЈО ГОКК на 27 мај.
За потсетување, Трајковски изминатите две години, пред да биде уапсен, преживеа неколку обиди за негова ликвидација.
Во него беше пукано во трговски центар, а беше фрлена и експлозивна направа во дворот од од неговиот дом во скопската населба Ќерамидница.