Како што се наведува во соопштението од Обвинителството, тие вршеле кршење, ископ и транспорт на карпи во поголем обем, и тоа во непосредна близина на изворите од кои градот Струга се снабдува со питка вода
Основното јавно обвинителство Струга предлага определување мерки на претпазливост против две правни лица од село Велешта, кои се сомничат дека со своите активности директно влијаеле врз загадување на водата за пиење во изворите во селото Шум.
При спроведување на истражните дејствија за утврдување на причините за загадувањето, истражните органи на терен затекнале работни машини во сопственост на двете фирми. Како што се наведува во соопштението од Обвинителството, тие вршеле кршење, ископ и транспорт на карпи во поголем обем, и тоа во непосредна близина на изворите од кои градот Струга се снабдува со питка вода.
Поради сериозноста на случајот, надлежниот јавен обвинител до судијата на претходна постапка доставил предлог за забрана за посета на парцелите каде што се вршел ископот и забрана за преземање какви било работни активности на целото подрачје.
Истрагата се води за две кривични дела од Кривичниот законик – незаконита експлоатација на минерални суровини и загадување на водата за пиење.
„Основното јавно обвинителство Струга продолжува да презема дејствија за обезбедување докази и испитување на евентуална кривична одговорност во однос на енормното загадување“,
се вели во соопштението од Обвинителството.
Основното јавно обвинителство (ОЈО) Струга пред десетина дена оформи предмет по информациите за енормно загадување на водата за пиење и за основни животни потреби на подрачјето на градот, со цел да се испитаат причините и евентуално сторени кривични дела против животната средина и природата.
Пред два дена струшкиот градоначалник Менди Ќура на вонредна седница на Советот на Општина Струга, на која единствена точка на дневниот ред беше расправата за проблемите на граѓаните со редовното снабдување со исправна вода за пиење, рече дека ископувањата направени околу изворите во селото Шум се главната причина што ја предизвикала матноста на водата од која се снабдуваат Струга и селата.
Тој посочи дека две компании низ годините вршеле ископувања, кои, како што забележа, биле длабоки и оштетувањата тешко ќе се санираат. Вината, според Ќура, е во неговите претходници и во надлежните институции, нагласувајќи дека ништо не било преземено за заштита на изворите.