Осомничените не го пријавиле престојот на странците, со што им помогнале да престојуваат во земјава подолго од законски дозволениот период од 90 дена во текот на 180 дена
Основното јавно обвинителство Скопје донесе наредба за спроведување истражна постапка против двајца турски државјани, на возраст од 30 и 26 години, поради основано сомнение за кривично дело помагање на странец при незаконит престој.
Обвинителството соопшти дека осомничените во текот на годинава, со намера да прибават противправна имотна корист, им помогнале на четворица странски државјани да престојуваат во земјава спротивно на Законот за странци.
Според информациите, двајцата турски државјани изнајмиле стан на улицата „Христијан Тодоровски Карпош“ во Скопје. Таму, за паричен надомест, им обезбедиле сместување на двајца турски и двајца узбекистански државјани.
Осомничените не го пријавиле престојот на странците, со што им помогнале да престојуваат во земјава подолго од законски дозволениот период од 90 дена во текот на 180 дена.
Поради постоење опасност од бегство, влијание врз сведоци и страв од повторување на делото, јавниот обвинител доставил до судијата на претходна постапка предлог за определување мерка притвор за двајцата осомничени.