МВР поднесе кривична пријава и за уште две други лица кои за одредена сума ги откупиле предметите и покрај тоа што знаеле дека потекнуваат од кривично дело и не го пријавиле во полиција
Основното јавно обвинителство Битола поведе истражна постапка против двајца ресенчани кои се сомничат дека извршиле продолжено кривично дело тешка кражба.
Обвинителството ја отвори постапката откако претходно од Секторот за внатрешни работи Битола информираа дека поденеле кривична пријава против М.М.(39) и И.Б.(19) двајцата од Ресен.
Исто така, од СВР Битола поднеле кривични пријави и против Д.Н.(29) од Битола и М.Џ.(27) од Охрид кои се сомничат дека сториле кривично дело прикривање.
Во соопштението од полицијата се наведува дека прво и второпријавениот, од почетокот на февруари до 23 април годинава во два наврати извршиле тешка кражба, при што на делница од Битола до село Кременица одзеле поголема количина на акумулатори, сопственост на Јавното претпријатие „Железници – инфраструктура“.
„Трето и четвртопријавениот за одредена сума ги откупиле предметите и покрај тоа што знаеле дека потекнуваат од кривично дело и не го пријавиле во МВР“,
велат од полицијата.
На тој начин, додава МВР, пријавените предизвикале материјална штета во висина од 10 606 746 денари.
За случајот информираа и од ОЈО Битола. Во описот на случајот оттаму велат дека двајцата осомничени жители на Ресен, во повеќе наврати насилно влегувале во објекти од цврста градба на железничката делница од пругата „Поранешно Фринко“ до селото Кремница, кои служеле за команда на светлосна и звучна сигнализација за железничкиот сообраќај.
„Кршејќи ги решетките од долниот дел на вратите со кои биле обезбедени вкупно осум објекти сопственост на оштетеното Јавно претпријатие за железничка инфраструктура – ‘Железници на Македонија’, осомничените демонтирале и одзеле вкупно 58 акумулатори со различна јачина, со што ја загрозиле сигурноста на железничкиот сообраќај. Потоа, двајцата осомничени ги продавале украдените акумулатори како отпадно железо“,
се вели во информацијата од ОЈО Битола.
Поради постоење околности кои укажуваат на опасност од влијание врз сведоци во постапката, како и можност осомничените да го повторат делото, од ОЈО Битола велат дека јавниот обвинител до судијата на претходна постапка доставил предлог за определување мерка притвор за двајцата осомничени.
Од Министерството за внатрешни работи велат дека за прво и второпријавениот од страна на судија на претходна постапка одредена им е мерка притвор во траење од 30 дена.