Двајцата наши државјани се евакуирани во камп во Маракеш. Тие се во добра состојба и утревечер патуваат за Мадрид
Министерството за надворешни работи (МНР) информира дека двајца македонски државјани се евакуирани и моментно се наоѓаат во камп во градот Маракеш по синоќешниот разорен земјотрес што го погоди Мароко.
Двајцата наши државјани се во добра состојба и утре вечерпатуваат за Мадрид.
Од МНР велат дека нашето Дипломатско-конзуларно претставништва во Каиро е во комуникација со надлежните институции во Мароко за евентуални наши државјани во погодените региони и потреба за евакуација.
„Ги повикуваме сите државјани на Северна Македонија кои во моментот се наоѓаат во Мароко и имаат потреба од конзуларна асистенција, да се јават на дежурниот телефон на Амбасадата во Каиро +20 103 361 5542 и СОС телефонот на Министерството за надворешни работи 075/ 273- 732“,
велат од МНР.
Во земјотресот со јачина од 6,8 степени што синоќа го погоди Мароко загинаа стотици луѓе, а бројките постојано растат.
Над 600 лица се повредени од кои 205 се во критична состојба.
Епицентарот на земјотресот бил во планините Атлас, на околу 72 километри југозападно од Маракеш, град со околу 840 илјади жители и популарна туристичка дестинација.