Локалните медиуми јавуваат дека денешното рочиште, на кое експретседателот на Албанија треба да биде запознаен со мерката притвор којашто му е одредена, е одложено за попладнево откако тоа го побарале адвокатите на Мета, обезбедувајќи повеќе време за да се запознаат со документите од досието
Експретседателот на Албанија и актуелен лидер на опозициската Партијата на слободата, Илир Мета, утринава се појави пред Специјалниот антикорупциски суд (СПАК), два дена откако беше уапсен поради сомнежи за корупција.
Локалните медиуми јавуваат дека денешното рочиште, на кое експретседателот на Албанија треба да биде запознаен со мерката притвор којашто му е одредена, е одложено за попладнево откако тоа го побарале адвокатите на Мета, обезбедувајќи повеќе време за да се запознаат со документите од досието.
Кога утринава се појавил во судницата, Мета упатил навредливи зборови кон првиот човек на Специјалното обвинителство против организиран криминал и корупција на Албанија (СПАК), Алтин Думани, откако по налог на оваа институција тој беше уапсен во понеделникот.
„Ме уапсивте по наредба на нарко државата, примате наредби од Рама, тоа е прекршување на законот“,
рекол експретседателот на Албанија, обраќајќи се кон обвинителите од СПАК.
На денешната седница во Специјалниот суд, како што објавија албанските медиуми, биле присутни тројцата обвинители кои го потпишале апсењето на Мета – Алтин Думани, Арбен Краја и Сотир Клапи.
Поранешниот албански претседател беше уапсен во понеделникот попладне во Тирана, по налог на Специјалното обвинителство против организиран криминал и корупција, поради сомнеж за перење пари, пасивна корупција и непријавување имот. Доколку биде осуден, може да добие казна затвор од 15 години.