Министерот за економија Крешник Бектеши денеска најави дека од утре -15 јуни, заклучно со 30 септември, се замрзнуваат маржите на повеќе производи
Државниот пазарен инспекторат од почетокот на јуни открил 30 неправилности кај трговците на мало и големо кои ја злоупотребиле економската криза и одмрзнувањето на цените и енормно ги зголемиле цените на производите.
Директорката на Пазарниот инспекторат, Анета Симеска Димоска, за Дојче веле вели дека се извршени вкупно 213 надзори во сите градови, а прекршувањата најчесто се направени по два основи – или трговците немале евиденција во објектот или таа не се водела согласно Правилникот за водење на евиденција во трговијата на големо и мало или има отстапувања.
Најголеми злоупотреби, според ДВ, се забележани на 3 јуни, кога започнаа контролите – дел од трговците, покрај тоа што ги одмрзнале цените и на нив пресметале 5 отсто ДДВ, вкалкулирале и маржа од осум, а некаде и по 25 и 27 проценти, а според Димоска, имало и случаи каде што цените биле зголемени со маржи од 38 проценти.
Најголемо зголемување на цените било забележано кај тестенините – некои трговци овие производи ги продавале со вкалкулирана маржа во цената од дури 35 отсто. Казните за трговците кои ги прекршиле законите зависат од големината на субјектот што го поседуваат и се движат од 400 до 5 000 евра.
Според Димоска, инспекциите натерале дел од трговците – па дел од нив ги вратиле цените по старо или, пак, го приспособиле поскапувањето согласно одлуката за одмрзнување на цените на основните производи.
Цените нагло се зголемија од 1 јуни откако завршија тримесечните антикризни мерка на Владата
Цените нагло рипнаа откако завршија тримесечните антикризни мерка на Владата, кои беа на сила до 1 јуни, а со кои беа замрзнати цените на основните прехранбени производи. Вицепремиерот за економски прашања Фатмир Битиќи вели дека откако инспекциите излегле на терен по укажувањата за вештачко зголемување на цените, тие се вратиле по старо или стагнираат.
Министерот за економија Крешник Бектеши денеска најави дека од утре -15 јуни, заклучно со 30 септември, се замрзнуваат маржите на повеќе производи: белиот леб – сечен и цел, бел шеќер и сончогледово масло за јадење ќе се продаваат со пет отсто трговска маржа во трговија на големо и пет отсто во трговија на мало. За пченично брашно, тип 400 и тип 500, макарони и шпагети од тврда пченица, бел ориз, трајно млеко и јајца се утврдува маржа од десет отсто во трговија на големо и трговија на мало.