Тој посочи дека последните податоци од Државниот завод за статистика (ДЗС) покажуваат дека во декември лани цените на храната и пијалаците се намалени за 0,4 проценти
Министерството за економија и труд во моментов не планира воведување нови рестриктивни мерки или ограничување на профитната бруто-маржа или на цените за прехранбените производи. Според министерот Бесар Дурмиши, состојбата на пазарот е стабилна, а официјалните податоци покажуваат благ пад на трошоците за живот во делот на храната.
Тој посочи дека последните податоци од Државниот завод за статистика (ДЗС) покажуваат дека во декември лани цените на храната и пијалаците се намалени за 0,4 проценти.
„Засега не гледаме причина да преземаме некакво ограничување на профитната бруто-маржа или ограничување на цените. Секојдневно ја следиме ситуацијата во комуникација со Државниот пазарен инспекторат (ДПИ) и ако има енормно зголемување, подготвени сме да реагираме“,
изјави Дурмиши одговарајќи на новинарско прашање.
Дурмиши рече дека минатата година Државниот пазарен инспекторат (ДПИ) има спроведено над 20 000 инспекциски надзори и биле изречени казни во вкупна вредност од 2,5 милиони евра.
Министерот кажа дека биле санкционирани трговци што профитирале на грбот на граѓаните без економска оправданост и најави дека има редовни контроли и оти веќе нема да се толерира неоправдано поскапување.
„Ако има енормно зголемување на цените како што беше претходно, тука сме, ќе реагираме и ќе преземеме мерки како што беше и порано“,
додаде тој.
Најновиот извештај на Државниот завод за статистика (ДЗС) покажува дека индексот на трошоците за живот во декември минатата година бележи годишно зголемување од 4,1 отсто во однос на истиот месец претходната година, а истовремено, индексот на цените на мало е зголемен за 3,7 отсто.
Инфлацијата, мерена преку индексот на трошоците за живот, во декември лани е зголемена за 0,4 отсто во споредба со претходниот месец.
Според податоците од ДЗС, растот на трошоците за живот е резултат на повисоки цени во повеќе сектори. Најзначаен пораст во декември во однос на претходниот месец е забележан во групата транспорт каде има зголемување од 5,8 отсто.
Во декември лани, во однос на претходниот месец, намалување на трошоците за животот е забележано кај храната и безалкохолните пијалаци за 0,4 проценти и кај облеката и обувките за 0,2 отсто.
Во декември минатата година премиерот Христијан Мицкоски рече дека не е планирано воведување на некои мерки, но најави дека инспекторите на ДПИ заедно со Комисијата за заштита на конкуренцијата (КЗК), се излезени на терен за детална инспекција на маркетите и оти целта е да се констатира дали има картелско здружување и договорно утврдување цени меѓу трговските синџири.