Од ХЕРА апелираат дека ова е повод за заедничка акција од родителите, училиштата и институциите за да се создаде безбедна и поддржувачка средина, каде што младите ќе се чувствуваат прифатени и ќе добијат навремена психосоцијална поддршка
Дури 53% од девојчињата и 19% од момчињата на возраст на 15 години имаат депресивно расположение, покажуваат податоците од ХБСЦ, студијата за однесувањaта поврзани со здравјето кај децата на училишна возраст, соопшти Асоцијацијата за здравствена едукација и истражување ХЕРА.
Тие апелираат дека ова е повод за заедничка акција од родителите, училиштата и институциите за да се создаде безбедна и поддржувачка средина, каде што младите ќе се чувствуваат прифатени и ќе добијат навремена психосоцијална поддршка.
„Врсничкото насилство остава длабоки последици врз менталното здравје на младите. Сè почесто се соочуваме со случаи на анксиозност, депресија и изолираност кај деца и адолесценти, предизвикани од навреди, исклучување или насилство од врсниците – како во училиште, така и онлајн, а 53% од девојчињата и 19% од момчињата на возраст на 15 години имаат депресивно расположение…Потребна е заедничка акција од родителите, училиштата и институциите за да се создаде безбедна и поддржувачка средина, каде младите ќе се чувствуваат прифатени и ќе добијат навремена психосоцијална поддршка“,
изјави денеска Весна Матевска од ХЕРА во училиштето „Кочо Рацин“ во О. Центар, каде што во име на одбележувањето на 25 годишнината на ХЕРА, се изработи мурал од уметникот Ненад Тонкин, на кој има и контакт телефон на кој може да се обратат сите на кои им е потребна стручна помош.
Училишниот психолог и психотерапевтка Ана Попризова вели дека проблем на кој треба повеќе да се работи е зголемување на свесноста, особено кај девојчињата, за безбедно користење на социјалните мрежи, но и за искуствата во партнерските релации бидејќи не препознаваат што значи контролирачка релација.
Попризова рече дека како психолог многу често забележува дека момчињата, последните неколку години, влегуваат во идеалот дека мора да бидат силни, а дека настапот кон девојките треба да биде полн со агресија и сето тоа го доживуваат како нормално.
„Имаме нормализација на родово базирано насилство…Стручните служби во училиштата континуирано работат со ученици и родители согласно внатрешните процедури, но кога е потребна терапевтска интервенција, постоечките ресурси не секогаш се доволни. Со вклучување на советувалиштата на ХЕРА – кои се дел од системот на социјална заштита – училиштата добиваат дополнителна поддршка за случаи кога учениците, семејствата или старателите имаат зголемени потреби“,
рече Попризова.
На настанот се обрати и директорката на ООУ „Кочо Рацин“, Гордана Јаневска, кој рече дека тие сакаат да создадат амбиент во кој децата правилно ќе се развиваат.
„Нашата цел е да создадеме амбиент на сигурност за целосен развој на нашите деца за да можат да ги реализираат своите потенцијали во вистинска насока – тоа е радост, среќа, љубов, разбирање и поддршка. Со оваа порака создаваме визуелна и модерна комуникација, достапна за сите на кои им е потребна. Приказната која ја презентираме е мотив да се помогне и отворено да се говори за ситуации и случувања на кои секојдневно работи и тимот на стручната служба во воспитно-образовниот процес“,
изјави Јаневска.
Муралот кој беше презентиран заедно со контакт телефон, од ХЕРА велат, претставува симбол на охрабрување, поддршка и солидарност против врсничко и семејно насилство, а воедно поттикнува на дијалог и активно дејствување за создавање безбедна и поддржувачка училишна средина.