Од ДУИ посочуваат дека ВМРО-ДПМНЕ е судски потврдено криминално здружение со лично признание на половина партија пред суд
Секојдневната кампања на ВМРО-ДПМНЕ против ДУИ, претседателот Али Ахмети, како и други членови на ДУИ, преку константно креирање лажни вести е обид да ги затскрие вистинските антиевропски и антиалбански мотиви на водството на ВМРО-ДПМНЕ, реагираат од ДУИ по обвинувањата на ВМРО-ДПМНЕ дека постои основан сомнеж дека кланот од Зајас, благодарение на политичката позиција на Ахмети во власта, енормно се богати.
„Градоначалникот на Бутел бара да се избришат имиња на улици само затоа што се имиња на албански дејци, Мицкоски забранува издавање на дозволи за градби и легализации на албански фирми и сопственици, забранува да се дава работа на албански компании од страна на нивните градоначалници, бара моноетничка влада и вели дека никогаш нема да го смени Уставот и дека не го интересира што велат од Брисел и од Вашингтон за европскиот пат на нашата земја. Ова ВМРО-ДПМНЕ е спадната на историски најниското ниво без ниту една вредност и затоа нема доверба членството во нивниот претседател и во партијата, туку повеќе им веруваат на претходното раководство кое им носеше само победи“,
се наведува во соопштението на интегративците.
Од ДУИ посочуваат дека ВМРО-ДПМНЕ е судски потврдено криминално здружение со лично признание на пола партија пред суд.
„Г. Али Ахмети побара истрага за сите во ДУИ и најави дека никој не е заштитен, но не и лов на вештерки најавуван од страна на ВМРО којшто ги потсетува граѓаните како имаат намера да владеат, а тоа е да бидат и истражител, и обвинител, и судија, и затвор, и медиум, и невладин претставник, сè во едно, заробена држава“,
се додава во соопштението на ДУИ.