Оттаму побараа секој од функционерите од владејачката коалиција да ги објави јавните средства потрошени за посетата на САД, а ОЈО ГОКК да започне целосна истрага за случајот
Опозициската Демократска унија за интеграција (ДУИ) ги обвини функционерите на „Вреди“ за злоупотреба на јавните средства со посетата на Вашингтон. Од ДУИ побараа секој од функционерите од владејачката коалиција да ги објави јавните средства потрошени за посетата на САД, а ОЈО ГОКК да започне целосна истрага за случајот.
„Овие поединци секако не ја претставуваат волјата на народот, но овој пат го покажаа вистинското лице на нивната алчност, личните интереси и темните агенди. Измамниците да ја прекинат злоупотребата веднаш и средствата да ги вратат во буџетот на државата“,
велат од ДУИ.
Срамна измама и обид за создавање илузија за меѓународна поддршка, според ДУИ, се изјавите на функционерите на „Вреди“ за официјални покани за учество на инаугурацијата на американскиот претседател Доналд Трамп.
„Наместо да ги претставуваат достоинствено интересите на граѓаните, тие се појавија шетајќи по улиците на Вашингтон, објавувајќи гротескни фотографии на социјалните мрежи пред плакатите на церемонијата и владините објекти. Оваа јавна фарса, платена со пари од даночните обврзници, е врв на манипулациите кои го карактеризираат овој политички субјект без визија, морал или одговорност кон граѓаните“,
додаваат од опозициската партија.
Инаку, во составот на македонската делегација, за која од Владата известија дека ќе присуствува на инаугурацијата на американскиот претседател Доналд Трамп, се премиерот Христијан Мицкоски, министерот за надворешни работи и надворешна трговија Тимчо Муцунски, првиот вицепремиер и министер за животна средина Изет Меџити и заменик-министерката за европски прашања Викторија Трајков
Дека се во посета на Вашингтон деновиве на своите фејсбук-профили објавија и министерот за здравство Арбен Таравари и претседателот на Собранието Африм Гаши. На една од фотографиите од средбите во Вашингтон објавена на социјалните мрежи на Таравари е присутен и ексминистерот за здравство Фатмир Меџити.
Во соопштение испратено до медиумите на 18 јануари, од владејачката „Вреди“ информираа дека им е укажана чест со, како што велат, добиената покана за учество на церемонијата на инаугурација на претседателот на САД,
„Учеството на лидерите на ‘Вреди’ на овој голем настан е доказ за силните врски што лидерите на ‘Вреди’ како претставници на албанците во Владата на Северна Македонија ги изградија со новата американска администрација. Затоа, поканата и присуството на лидерите на ‘Вреди’ на најважната можна церемонија што се одржува во светот претставува посебна чест“,
наведоа од владејачката коалиција во соопштението од 18 јануари.