Шаќири најави официјален став од ДУИ за прогласувањето на струшкиот градоначалник Рамиз Мерко за неподобен за влез во САД
ДУИ е политичка партија што секогаш била за ветинг за сите функционери, вели министерот за образование и наука Јетон Шаќири, кој е и висок функционер во Демократската унија за интеграција.
Коментарот на Шаќири доаѓа како одговор на новинарско прашање по вчерашното прогласување на струшкиот градоначалник Рамиз Мерко за неподобен за влез во САД.
„ДУИ како политичка партија секогаш била за ветинг и ДУИ го бара ветингот за сите функционери кои доаѓаат од централно и локално ниво“,
рече Шаќири пред почетокот на дебатата за промоцијата на анализата „Политичко образование во Северна Македонија“, во организација на Фондацијата за демократија на Вестминстер (ВФД) и Претседателскиот центар за политичко образование ПЦПО.
Шаќири најави дека ќе има официјален став од партијата и за политички прашања новинарите ги упати да се обратат до партијата.
По одлуката на Соединетите Американски Држави да го прогласат струшкиот градоначалник Рамиз Мерко за неподобен за влез во САД се огласи и вицепремиерката задолжена за политики за добро владеење Славица Грковска која очекува од правосудните органи соодветно да ги разберат „јасните пораки и конкретните чекори кои меѓународните сојузници на С Македонија ги преземаат во борбата против корупцијата“ во земјава.
Во образложението на американскиот Стејт департмент се наведува дека Мерко како градоначалник на Струга присвоил средства и се мешал во судските и во другите јавни процеси, притоа нанесувајќи ѝ штета на вербата на јавноста во демократските институции и функционерите на Северна Македонија.
Стејт департментот, исто така, ги означува и сопругата на Мерко, Шпреса, како и трите возрасни деца Генц, Назмије и Дренуша како неподобни за влез во САД.