„Оваа комисија треба да се формира веднаш и да вклучи претставници на ОБСЕ, како и претставници од амбасадите на САД, ЕУ и земјите членки на Европската Унија во својство на набљудувачи, со цел да се обезбеди фер, независен и транспарентен истражен процес“, велат од опозициската партија
Опозициската Демократската унија за интеграција (ДУИ) соопшти дека пратениците од коалицијата „Европски фронт“ денеска ќе поднесе официјално барање за формирање посебна парламентарна комисија која ќе го истражи, како што велат, селективниот и едностран пристап на правосудниот систем во истрагата за трагедијата во Кочани.
Изминатите денови од ДУИ во повеќе наврати реагираа дека истрагата за пожарот во т.н. кабаре во Кочани се води селективно и дека надлежните органи што ја спроведуваат се под контрола на Владата.
Опозициската партија бара во комисијата да бидат вклучени и претставници на амбасадите на меѓународните партнери на земјава во својство на набљудувачи.
„Оваа комисија треба да се формира веднаш и да вклучи претставници на ОБСЕ, како и претставници од амбасадите на САД, ЕУ и земјите членки на Европската Унија во својство на набљудувачи, со цел да се обезбеди фер, независен и транспарентен истражен процес“,
се вели во соопштението од ДУИ.
Ставот на партијата е дека селективната правда во конкретниот случај создала ситуација без преседан, која, како што наведуваат, ги загрозува темелите на правната држава и довербата на граѓаните во институциите.
„Неодговорноста или политизацијата на правдата за теснопартиски цели не ги загрозува само основните права на граѓаните, туку и демократската стабилност и европската перспектива на земјата. Парламентарната група на ‘Европскиот фронт’ денеска ќе поднесе официјална иницијатива за ова прашање“,
велат од ДУИ.
Оттаму очекуваат Собранието да дејствува со максимална одговорност и сериозност, за да се обезбеди, како што велат, независна, веродостојна и инклузивна истрага.
Од опозициската партија пред два дена обвинија дека истрагата за трагедијата во Кочани, во кој животот го загубија 59 млади лица, е политички прогон. Порачаа дека ќе соработуваат со секоја „објективна и независна истрага, но нема да престанеме да бараме јасни одговори на очигледните прашања и да замолчиме пред политичкиот прогон“.
Претходно ДУИ реагираше и на одлуката на Јавното обвинителство за 30-дневен притвор на поранешниот министер за економија Крешник Бектеши и други претставници на претходната влада, посочувајќи дека концептот на „верижни пропусти“ што довеле до трагедијата не постои во терминологијата на Кривичниот законик.
Коментирајќи ги реакциите, премиерот Христијан Мицкоски во вторникот рече оти жали што од ДУИ не излегле „од онаа матрица што ја гледаме на политичката сцена повеќе од 20 години и, наместо да изразат сочувство и да се вклучат во истрагата, се обидоа овој случај да го политизираат и етнизираат, односно на глодачки начин се обидоа да добијат некој политички поен на сметка на несреќата на овие невини жртви“.