Вицепремиерот за економски прашања верува дека пратениците ќе имаат доблест на 23 март да ја изгласаат потребата од донесување на законите
Опозицијата не може да биде одговорна за тоа што во парламентот не се се уште донесени законите од петтиот сет антикризни мерки, оцени вечерва Трајко Славески, член на Извршниот комитет на ВМРО-ДПМНЕ во гостување на ТВ 24, наспроти вицепремиерот Фатмир Битиќи, кој изрази очекување дека за „пакетот“ ќе се гласа на седницата на 23 март.
„Мојот став за петтиот пакет антикризни мерки е ист како и за претходните четири пакети кризни мерки. Парламентарната група на ВМРО-ДПМНЕ ги поддржа мерките што значат заштита на граѓаните и на претпријатијата, бизнисите во овие времиња кои не се ни малку лесни. Сега фактот што извршната власт нема адекватна поддршка во парламентот, тоа е за жалење на сите нас. Нешто што е предадено од страна на Владата како предлог за измени на законите уште во средината на февруари, а да се стави на седница дури на 23 март, со неизвесност дали ќе се фатат роковите, не може воопшто да се стави на товар на најголемата опозициска партија“, .
рече Славески
Тој вели дека го загрижува тоа што парламентот е блокиран и воопшто не функционира поради нестабилното мнозинство на власта.
„Во моментот кога парламентот имаше мнозинство да изгласа доверба на Владата, и нашите пратеници кажаа дека тогаш можело, на таа седница, кога имале 62 пратеника да ја поминат првата фаза, па сега немаше да чекаме на комисиите. Ние сега чекаме на 23а март да се констатира потребата од донесување закон“,
рече Славески
Според него, загрижува тоа што Владата најави дека вој пакет мерки треба да биде последен во однос на субвенциите на плати, што, како што вели, значи сигнал дека толку се можностите на власта.
„Гледаме дека, сепак, не сме на крајот на пандемијата. А економските последици и натаму ќе бидат доста сериозни“,
рече Славески.
Битиќи, пак, рече дека Владата верува дека пратениците ќе имаат доблест на 23 март да ја изгласаат потребата од донесување на законите од петтиот антикризен пакет, за тој што поскоро да стане функционален. Доколку е потребно, рече, ќе се разговара и со пратениците од парламентарното мнозинство да се интервенира преку амандмани за да не се пропушти февруари како месец во кој би се искористиле мерките.
„ За жал, сега, бидејќи законите се влезени во собраниска процедура, Владата не може да даде амандмани. Ние се уште веруваме дека ќе има доблест на 23 март да поминат законите од петтиот пакет, за да влезат во комисиска расправа и за неколку дена да се изгласаат за февруари да не се пропушти како месец во кој би требало стопанственците да ја добијат помошта за да ги зачуваат работните места. Ако е нужно, ќе разговараме со сите наши пратеници од владејачкото мнозинство и од опозицијата да предложат амандмани со кои би требало да стигне помошта за февруари“ ,
рече Битиќи.
Тој истакна дека состојбата се следи и Владата соодветно ќе се одговори во секој момент. Доколку е потребно, рече, ќе донесе нов пакет соодветни мерки кои ќе имаат најмало негативно влијание на секој чинител во општеството. Порача дека сега не е време за политички игри, туку треба да надвладее разумот.
„Сметам дека разумот ќе надвладее, затоа што во период на економска и здравствена криза не треба да внесуваме премногу политика. Ќе има време за политички мегдан. Сега е важно дали и како ќе ја поминеме економската и здравствената криза. Во овој момент не треба дневно-политички да калкулираме, туку да го направиме она што навистина би сакале да го направат другите за нас, кога ние би се нашле во истата ситуација“,
рече Битиќи.