Семејството на социјалните мрежи обвини дека таа починала чекајќи кислород
Државниот санитарен и здравствен инспекторат (ДСЗИ) денеска спроведува вонреден инспекциски надзор во Клиничката болница во Штип за смртта на 41-годишната пациентка, која почина на Инфективното одделение во болницата, соопшти Министерството за здравство.
„Директорот на Клиничката болница Штип, д-р Ален Георгијев, исто така побарал да се изготви комплетен извештај за начинот на третман на пациентката. По завршениот вонреден инспекциски надзор, јавноста ќе биде детално информирана“,
велат од Министерството за здравство.
Ќерката на починатата пациентка вчера на социјалните мрежи обвини дека мајка ѝ два дена молела за кислород. Таа објави фотографии од повиците на телефонот на мајка ѝ, прикажувајќи како таа се обидувала да стапи во контакт со медицинските лица и пишувала пораки дека ѝ треба кислород.
„Мајка ми нема да ја вратиме никогаш повеќе, на мајка ми никогаш повеќе нема да и биде потребен кислород, мајка ми повеќе никогаш нема да моли за шанса да вдише и шанса да живее. Но, има други мајки, татковци, дедовци и баби кои ќе имаат потреба неуспешните обиди на мајка ми да се претворат во успешни“,
напиша ќерката на починатата на социјалните мрежи.
Директорот на болницата пред неколку дена посочи дека потрошувачката на кислород во болницата е драстично зголемена бидејќи имало наплив на пациенти во тешка состојба.
Георгијев рече дека поради напливот на пациенти, обезбедиле и повеќе регулатори за кислородот и апарати за следење на сатурацијата на кислородот во крвта.
За третманот на болните во штипското инфективно одделение критикуваше и ВМРО-ДПМНЕ, од каде што обвинија дека ситуацијата во штипската болница е катастрофална и дека пациенти се оставени без кислород.