Оттаму посочија дека утре ќе биде организиран надзор во болниците каде е примено починатото дете
Заменик-министерот за здравство Јовица Андовски денеска потврди оти од Државниот санитарен и здравствен инспекторат (ДСЗИ) е побарано да се изврши вонреден инспекциски надзор во Општата болница во Кавадарци и на Детската клиника во Скопје во врска со починатото тригодишно дете од Кавадарци.
И од ДСЗИ велат дека утре ќе биде организиран надзор во болниците каде е примено починатото дете.
Родителите на починатото дете бараат да се испита можно постоење на лекарска грешка во случајот.
„Во понеделникот сабајлето во дваесет минути за три часот ме разбуди сопругата со детето во рацете омалаксано и ми рече да станам брзо оти не е арно синчето. Најпрво побаравме лекарска помош во Кавадарци, но ми се чини дека нашата ситуација не беше сфатена сериозно. Затоа бараме да се формира комисија што ќе ги утврди точните околности под кои настанала смртта. Детето ни почина во рацете“,
изјави таткото на починатото дете за МИА.
Од полицијата соопштија дека тригодишно дете починато е донесено на комплексот клиники „Мајка Тереза“ во Скопје.
„Неговата мајка Т.Ѓ.С.(36) од Кавадарци изјавила дека околу 3:00 часот го однела во Општата болница Кавадарци, од каде ги упатиле во Клиниката за детски болести при Комплекс клиники ‘Мајка Тереза‘ во Скопје, каде што во 8:45 часот била констатирана смрт“,
пишува во полицискиот извештај.