„Бараме од судот веднаш да го блокира стапувањето во сила на оваа наредба и да се погрижи правата на децата родени во Америка кои се засегнати од оваа наредба да останат во сила додека трае судскиот спор. Претседателот со оваа наредба ги пречекори своите овластувања за една милја и ќе бараме одговорност“, навел јавниот обвинител на сојузната држава Калифорнија, Роб Бонта
По десетиците извршни наредби што новиот американски претседател Доналд Трамп ги потпиша уште вчера во Овалната соба по неговата инаугурација, денеска излегоа и првите реакции поврзани со нив.
На конкретен чекор се одлучија осумнаесет сојузни држави на САД и два града, предводени од демократите, кои, како што пренесе „Гардијан“, поднеле тужба против новата администрација на Трамп поради извршната наредба со кој сака да стави крај на правото на добивање американско државјанство со раѓање.
Во тужбата, предводена од Калифорнија, Масачусетс и Њу Џерси, се тврди дека федералниот закон и 14. амандман од Уставот им даваат државјанство на повеќето деца родени на територијата на САД и бараат од судот да ја запре извршната наредба на Трамп.
„Извршната наредба на претседателот со која се обидува да го укине правото на државјанство со раѓање е неуставна и сосема неамериканска. Како дом на Вонг Ким Арк, роден во Сан Франциско, кој се бореше, успешно, да му се признае американското државјанство, Калифорнија ги осудува обидите на претседателот да ја избрише историјата и да игнорира 125 години преседан на Врховниот суд. Бараме од судот веднаш да го блокира стапувањето во сила на оваа наредба и да се погрижи правата на децата родени во Америка кои се засегнати од оваа наредба да останат во сила додека трае судскиот спор. Претседателот со оваа наредба ги пречекори своите овластувања за една милја и ќе бараме одговорност“,
ја пренесува „Гардијан“ изјавата на јавниот обвинител на Калифорнија, Роб Бонта.
Со извршната наредба потпишана вчера, Трамп има намера да го ограничи правото на државјанство со раѓање само на деца со најмалку еден родител кој е или државјанин на САД или легален постојан жител.
Извршната наредба, издадена во понеделникот, исполнува нешто за што Трамп зборуваше за време на претседателската кампања, но неизвесно е дали ќе успее бидејќи и активистите за имиграција најавија тужби за блокирање на наредбата, пишува агенцијата Асошиејтед прес (АП).
Правото на државјанство со раѓање значи дека секој роден во САД може да стане американски државјанин, без оглед на имиграцискиот статус на нивните родители.
На пример, луѓето кои се во САД со туристичка или друга виза или се во земјата илегално може да станат родители на американски државјанин ако нивното дете е родено во САД.
Тоа правило важи со децении и е вградено во 14. амандман на Уставот на САД.
Сепак, Трамп и неговите сојузници го оспоруваат толкувањето на амандманот и велат дека треба да има построги стандарди за добивање државјанство.
Амандманот беше донесен по Граѓанската војна во САД (1861-1865 г.) и ратификуван во 1868 година и гласи:
„Сите лица родени или натурализирани во Соединетите Американски Држави и кои подлежат на јурисдикција на земјата се државјани на САД и на државата во која живеат“
Потпишувајќи ја извршната наредба вчера и коментирајќи ја нејзината основаност, како и забелешките дека се коси со Уставот на САД, Трамп рече:
„Можеби, но мислиме дека имаме добра основа. Но, можеби сте во право, ќе видиме. Апсурдно е, ние сме единствената земја во светот кое го дава ова со раѓање, како што знаете, и е апсолутно апсурдно. Но, ќе видиме, мислиме дека имаме добра основа и одредени луѓе веќе со децении сакаат да го направат ова“,
рече новиот американски претседател.