Светската банка укажува дека македонската економија во моментот не покажува динамика која би можела да поддржи стапка на раст над три отсто. Така, проекциите од 3,7 отсто, па дури и четири отсто презентирани од одредени владини претставници, според него, повеќе личат на претпоставки отколку на факти произлезени од економска анализа
Тековната економска политика на Владата не создава простор за здрав и одржлив раст на бруто-домашниот производ (БДП) за над три отсто. Од друга страна, имаме и владин модел во кој очекувањата се повисоки од капацитетите. Ова денеска на прес-конференција го соопшти пратеникот на Социјалдемократскиот сојуз (СДСМ) и поранешен вицепремиер за економски прашања Фатмир Битиќи коментирајќи ги проекциите на Светската банка за растот на македонската економија за 2025 година, за кои рече дека се ревидирани од три отсто на 2,6 отсто.
„Надолната ревизија продолжува и за 2026 година со очекуван раст од 2,7 отсто, наместо претходно проектираните 3,2 отсто. Ова е сигнал што произлегува од реалните економски текови, а не од желби и политички маркетинг. Светската банка не се занимава со реторика, туку со економска логика, според која во 2027 година се очекува раст од 2,8 отсто, нешто што треба да го земеме за сериозно“,
вели Битиќи.
Според него, Северна Македонија се соочува и со неповолен факт, односно има најниска проекција за економски раст во регионот на Западен Балкан за 2025 година и под регионалниот просек од 3,2 отсто.
Светска Банка, анализира Битиќи, забележува и дека земјата се соочува со проширен фискален дефицит, слабеење на трговската позиција, номинално забавување на инфлацијата, идентификувајќи домашни ценовни притисоци што сигнализираат ризици за стабилноста на куповната моќ.
„Сето ова упатува дека просторот што Светска банка го детектира за брзо економско закрепнување е многу потесен отколку што се претставува во јавноста од страна на Владата“,
кажа Битиќи.
Светската банка укажува дека македонската економија во моментот не покажува динамика која би можела да поддржи стапка на раст над три отсто. Така, проекциите од 3,7 отсто, па дури и четири отсто презентирани од одредени владини претставници, според него, повеќе личат на претпоставки отколку на факти произлезени од економска анализа.
„Поради доцнење на повратот на ДДВ и на исплатата на договорените обврски од страна на државата, имаме нарушувања во ликвидноста на компаниите, што дополнително ја згаснуваат економската активност. Фирмите чекаат наплата од државата и до девет месеци, што е системски ризик што ја намалува стопанската активност“,
рече пратеникот.
Според него, земјата останува со најниски плати во регионот, а истовремено со едни од највисоките цени.
Додава дека владините мерки за ограничување на маржите, онлајн објавување на цените од страна на маркетите и обидите со новогодишната кошничка останаа без резултати, но и дека трпезата за 1 Мај ќе биде уште поскромна за работниците.
Од СДСМ денеска реагираат дека наместо системско решение за ценовните шокови добиваме маркетиншки трикови и привремени потези што немаат реален ефект.