Директорот на Дирекцијата за заштита и спасување Стојанче Ангелов вели дека на одредени места од пожарната линија сè уште може да се забележи чадење. Поради тоа, екипите ќе продолжат со пешадиско дејствување за да се изгаснат жешките точки и да се спречи повторно ширење на пожарот
Пожарот во повеќенаменското подрачје „Јасен“, во кој десетина дена гореше мешана шума, конечно е изгаснат од дождот што утринава што го зафати регионот. Сепак, властите предупредуваат дека и покрај врнежите, опасноста од повторно разгорување сè уште постои.
Директорот на Дирекцијата за заштита и спасување Стојанче Ангелов вели дека на одредени места од пожарната линија сè уште може да се забележи чадење. Поради тоа, екипите ќе продолжат со пешадиско дејствување за да се изгаснат жешките точки и да се спречи повторно ширење на пожарот.
„Ќе продолжиме со пешадиско дејствување врз жешките точки кои покажуваат знаци на горење за да не дозволиме повторно разгорување на овој исклучително тежок пожар за гаснење затоа што на некои места имаме дебели слоеви од лисја и шишарки што се исклучително горливи, а ветрот што постојано дува и го менува правецот набргу ќе ја исуши вегетацијата и постои можност од повторно будење на пожарот“,
вели Ангелов во неговата утринска изјава.
Тој додаде дека теренот ќе биде пребаран и со дронови со термални камери, а екипи на ЈП „Јасен“ ќе патролираат додека не се потврди дека пожарот е целосно изгаснат.
Ангелов вели дека и покрај дождот што утринава го имаше во северните и северозападните делови на земјата, УХМР најавува силен ветар со брзина до 70 километри на час, што значително го зголемува ризикот од пожари на отворено во другите делови од државата.
Тој апелира до граѓаните да бидат исклучително внимателни за да не предизвикуваат пожари. Тој, исто така, ги повика граѓаните да го пријават секое сомнително однесување, како и да пријават до ЕВН или на бројот 112 доколку забележат електрични жици кои искрат или се допираат.
Од Центарот за управување со кризи (ЦУК) денеска информираа дека до 7 часот на територија на целата држава се регистрирани вкупно 27 пожари на отворено. Од нив активни се осум, а изгаснати се 19.