Според министерот, годинава се набавени најголем број вакцини против сезонски грип – 80 000 дози четиривалентна вакцина од реномираниот производител „Абот“ од Холандија“
Досега се пријавени околу 49 илјади граѓани за вакцинација против сезонски грип, а првиот ден се вакцинирани над две илјади лица, соопшти денеска министерот за здравство Азир Алиу при посетата на Одделението за епидемиологија во Гостивар, каде што и ја прими вакцината против сезонски грип.
„Денеска сум во мојот роден Гостивар, каде што и се вакцинирав и преку мојот личен пример сакам да ја истакнам важноста од навремена вакцинација, како најефикасна превентивна мерка за заштита на здравјето. Апелирам граѓаните навреме да се заштитат од сезонскиот грип, а тоа особено да го направат лицата што спаѓаат во ризичните групи“,
рече Алиу.
Ги повика граѓаните да се пријават за вакцинација против сезонски грип преку апликацијата vakcinacija.mk или кај својот матичен лекар.
Вакцинацијата против сезонски грип се спроведува на 35 вакцинални пункта низ државата, од кои пет се во Скопје.
Оцени дека бројката на досега пријавените за вакцинација ја покажува зголемената свесност за значењето за заштита од грип, со што се потврдува важноста и потребата од оваа превентивна мерка.
Според Алиу, Министерството за здравство годинава набави најголем број вакцини против сезонски грип – 80 000 дози четиривалентна вакцина од реномираниот производител „Абот“ од Холандија“.
Со бесплатна вакцинација се опфатени ризичните категории население, како повозрасни лица над 65 години, лица со хронични заболувања, здравствени работници, бремени жени, деца на возраст од шест месеци до пет години, како и лица сместени во старски домови и вработени во овие установи.