„Во моментов тоа се само шпекулации. Досега немаме никаква покана од страна на Владата. Ние како партија стоиме на тоа дека сме за европската иднина на земјата. Кога ќе има нешто официјално од кај нас, за тоа ќе ја информираме јавноста“, велат за „360 степени“ од Европската демократска партија
Информациите за наводни разговори за влез на ЕДП во Владата во јавноста се појавија денеска, а беа и една од темите на прес-конференцијата на министерот за надворешни работи и потпретседател на ДУИ, Бујар Османи
Новата партија на Аријанит Хоџа – Европска демократска партија (ЕДП),⁸ досега не добила покана за влез во Владата, велат од партијата за „360 степени“ по информациите што се појавија во јавноста дека наводно се водат разговори за нејзина партиципација во извршната власт.
„Во моментов тоа се само шпекулации. Досега немаме никаква покана од страна на Владата. Ние како партија стоиме на тоа дека сме за европската иднина на земјата. Кога ќе има нешто официјално од кај нас, за тоа ќе ја информираме јавноста“,
велат за „360 степени“ од Европската демократска партија.
Информациите за наводни разговори за влез на ЕДП во Владата во јавноста се појавија денеска, а беа и една од темите на прес-конференцијата на министерот за надворешни работи и потпретседател на ДУИ, Бујар Османи.
Одговарајќи на новинарско прашање, Османи рече дека нема информации за наводни разговори за влез на партијата на Аријанит Хоџа во Владата и дека тоа што може да го каже е дека идејата е да се промовира европскиот фронт, во кој, како што кажа, има место и за Европската демократска партија.
Дел од прашањето што му беше упатено на Османи беше дали е точно дека се разговара ДУИ да отстапи дел од своите министерски места во Владата.
„За такво конкретно нешто немам информации (за разговори за влез на ЕДП во Владата н.з.). Тоа што можам да кажам е дека идејата е да се промовира европскиот фронт. Никогаш како досега општеството не е поларизирано на про-Европа и анти-Европа. Сега е време кога се кршат копјата, сега кога се поминува крстопатот е време секој да се позиционира, затоа европскиот фронт е отворен за сите, независно од политички партии врз основа на етничка припадност, врз основа на идеолошка припадност или каква било друга припадност надвор од ЕУ. Така што во европскиот фронт има место и за партијата на Аријанит Хоџа и другите партии што сметаат дека сега е време, после ова на Шарл Мишел веќе нема простор за било какво губење време“,
изјави Османи на посебната прес-конференција, што ја одржа по онаа со канадската министерка за надворешни работи Мелани Жоли, која е во официјална посета на С Македонија.
Хоџа, инаку доскорешен заменик-претседател на движењето Беса, реши да се одвои и да формира своја партија откако тројца политичари од албанскиот опозициски кампус – неговиот доскорешен партиски лидер Биљал Касами, Изет Меџити од „огнените“ и Африм Гаши од Алтернатива соопштија дека создаваат заеднички опозициски фронт.
Како причина за ваквиот чекор, Хоџа тогаш наведе дека целта на иницијаторите не е политичка промена, туку „перење“ политички фигури кои до неодамна биле актери во одржувањето на актуелната власт во живот.
Основачкото собрание на Европската демократска партија се одржа на 12 август во Скопје, а Хоџа тогаш изјави дека новата партија ќе дејствува конструктивно во Собранието, а првата битка ќе биде носењето на уставните измени.
Новата партија ЕДП формално нема свој пратеник во законодавниот дом, но неформално, за нивен претставник во Собранието може да се смета Бастри Бајрами, кој заедно со Хоџа се одвои од движењето Беса. Тој од 26 јули дејствува како независен пратеник во Собранието.