Вкупната вредност на медицинските материјали, како што наведуваат од иницијативата, изнесува 286 120 денари или околу 4 600 евра и тие се целосно обезбедени преку донации од хумани граѓани и компании
Иницијативата „Сапорт Кочани“ (SupportKocani) и Универзитетската клиника за пластична и реконструктивна хирургија успешно ја финализирале донацијата од хумани граѓани наменета за повредените во трагичниот пожар во т.н. кабаре „Пулс“ во Кочани што се случи на 16 март.
Како што информираа денеска од Иницијативата, постапката е завршена со формално потпишување договор за донација и медицинската опрема и суплементи се веќе доставени на Клиниката и активно се користат во третманот на повредените.
Донацијата, според „Сапорт Кочани“ вклучува 100 комплети T-LAB PRP KIT, 10 комплети EXOMINE SMART KIT, четири пакувања аминокиселини и четири пакувања протеини.
Вкупната вредност на медицинските материјали, како што наведуваат оттаму, изнесува 286 120 денари или околу 4 600 евра и тие се целосно обезбедени преку донации од хумани граѓани и компании, кои континуирано ја поддржуваат иницијативата.
Донираните материјали, појаснуваат оттаму, се наменети за третман и регенерација на кожата, забрзување на зараснување на рани и подобрување на закрепнувањето кај пациентите со тешки повреди од изгореници.
„Нутритивната поддршка претставува дополнителна помош за јакнење на организмот во процесот на рехабилитација“,
се додава во соопштението.
Во рамките на посетата на Клиниката за пластична и реконструктивна хирургија, тимот на „Сапорт Кочани“ ги посетил и пациентите кои сè уште се хоспитализирани на Клиниката за да им изразат поддршка и желби за побрзо закрепнување.
„Продолжуваме со фокусирана, директна и одговорна поддршка за секој поединец кој е засегнат од трагедијата. Оваа соработка со една од клучните здравствени установи во државата претставува важен чекор во обезбедувањето на стручна медицинска нега. Искрено им благодариме на сите хумани граѓани, компании и поддржувачи. Токму тие ја направија оваа помош возможна,“,
велат од „Сапорт Кочани“ додавајќи дека иницијативата останува посветена на транспарентност, партнерство со институциите и долгорочна грижа за сите погодени лица.
Во пожарот кој на 16 март годинава се случи во т.н. кабаре „Пулс“ во Кочани загинаа 62 лица на повеќе од 200 беа повредени.