Долниот дом на британскиот Парламент вечерва го усвои законот за Брегзит, со кој се дозволува излегување на земјата од Европската Унија до крајот на месецов. 330 пратеници беа „за“, а 231 „против“.
Големото мнозинство што го освоија конзервативците на премиерот Борис Џонсон на изборите минатиот месец го овозможи усвојувањето на законот и покрај противењето на помалите партии.
Законот сега треба да помине во Домот на лордовите, горниот дом на британскиот Парламент, кој може да го одложи, но не и да го поништи усвојувањето од долниот дом.
Усвојувањето на законот е голема победа за Џонсон, кој како клучна цел на својот премиерски мандат го наведе излегувањето на земјата од ЕУ.
Велика Британија за излез од ЕУ гласаше на референдум во 2016 година. Меѓутоа, пратениците во Парламентот неколкупати претходно ги осуетија обидите на Борис Џонсон и на неговата претходничка Тереза Меј за излез на земјата од ЕУ. Меј поради тоа во јули поднесе оставка.
Инаку, последниот ден од јануари ќе почне само првата фаза од излегувањето, т.н. „преоден период“, предвиден за да се избегне нагло прекинување на врските, за чие време Велика Британија и ЕУ треба низ преговори да ги утврдат идните односи.