Зеленски во интервју за британскиот весник „Гардијан“ изјави дека доколку се одржат преговори би предложил размена на територии што се под контрола на украинските сили во руската Курска област, во замена за враќање на украински територии кои моментално се окупирани од Русија
Ако американскиот претседател Донал Трамп успее да ги доведе Украина и Русија на преговарачка маса, украинскиот претседател Володимир Зеленски планира да ѝ понуди на Русија едноставна размена на територии, откажувајќи се од земјиштето што Киев го држеше во руската област Курск од почетокот на ненадејната офанзива пред шест месеци.
Зеленски во интервју за британскиот весник „Гардијан“ изјави дека доколку се одржат преговори би предложил размена на територии што се под контрола на украинските сили во руската Курска област, во замена за враќање на украински територии кои моментално се окупирани од Русија.
„Ќе размениме една територија за друга“,
посочува Зеленски.
Тој не прецизира кои украински територии би биле предмет на таква размена.
„Не знам, ќе видиме. Но, сите наши територии се важни, нема приоритет“,
додава Зеленски.
Русија моментално окупира околу 20 отсто од територијата на Украина, особено во источните и јужните региони. Широката инвазија започна на 24 февруари 2022 година и трае речиси три години. Во август минатата година, Украина изведе неочекувана офанзива во западниот дел на руската Курска област, а и покрај руските контраофанзиви, сè уште контролира дел од освоената територија.
Според претставници на Киев, операцијата во Курск била со цел да ги заштити пограничните региони, а заземените територии би можеле да се користат како предност во евентуални мировни преговори.
Зеленски постојано нагласува дека секој мировен план мора да вклучува силни безбедносни гаранции од сојузниците, за да се спречи повторна руска агресија.
Во петокот, американскиот претседател Доналд Трамп изјави дека оваа недела веројатно ќе се сретне со Зеленски за да разговараат за прекин на војната. Во неделата, пак, рече дека остварил контакт со рускиот претседател Владимир Путин, но не прецизираше кога. Кремљ не ја потврди, ниту ја демантираше оваа информација.