„Во објавите на британските медиуми се наведува ‘неуспешни апликанти за азил да ги праќаат во трети земји’. Да потенцирам и да кажам јасно и гласно пред македонската јавност дека таква тема не е разговарана, но доколку се разговара, исто така ќе биде одбиена од наша страна“, изјави премиерот
Додека јас сум премиер, нема да никне ниту еден шатор во кој ќе бидат сместени илегални мигранти и нема да примиме ниту еден илегален мигрант – напротив, ќе ја зајакнеме борбата против илегалната миграција со сојузниците во НАТО. Ова денеска го изјави премиерот Христијан Мицкоски по наводите на британските медиуми дека Велика Британија можеби ќе ги депортира одбиените баратели на азил во Северна Македонија, во обид да ја обесхрабри нелегалната миграција. За секој преземен мигрант, Британија би ѝ плаќала на Македонија.
Премиерот тврди дека со британските власти оваа тема не е разговарана, а и да се разговара, ќе биде одбиена.
„Во објавите на британските медиуми се наведува ‘неуспешни апликанти за азил да ги праќаат во трети земји’. Да потенцирам и да кажам јасно и гласно пред македонската јавност дека таква тема не е разговарана, но доколку се разговара, исто така ќе биде одбиена од наша страна. Што е разговарано? Разговарано е дека заеднички ќе се бориме против илегалната миграција бидејќи, верувале или не, ние ја браниме Европа од Европа бидејќи илегалните мигранти влегуваат токму од граница којашто е граница со земја членка на ЕУ“,
изјави Мицкоски одговарајќи на новинарски прашања.
Во однос на изјавите на лидерот на СДСМ, Венко Филипче, кој повика на мобилизација на граѓаните против политиките на Владата во однос на прашањето за мигрантите, премиерот рече дека во отсуство на каква било идеја која може да придонесе во општествениот живот во земјава, опозиционерите се фатиле за тема која, како што рече, е тотален антипод на нивната политика и природно припаѓа на политиката на ВМРО-ДПМНЕ.
„Антиилегалната имиграција е основен столб и е дел од фундаменталните темелни вредности врз кои почива ВМРО-ДПМНЕ. За таа тема да водите кампања, тоа претставува однапред изгубена битка. Јас ги разбирам, немаат идеја, немаат концепт, се обидуваат да се мобилизираат и сега ќе измислуваме теми, ќе растураме пердуви, ама каде од сите теми токму ја најдоа оваа која почива и е практично фундаментална вредност на политиките на ВМРО-ДПМНЕ, а тоа е борбата против илегалната миграција“,
рече Мицкоски.
Премиерот најави дека Владата ќе се спротивстави на илегалната миграција и по примерот на „Безбеден град“ ќе развие проект „Безбедна држава“, со кој, како што рече, македонските граници конечно ќе бидат мониторирани за да се спречи илегалната миграција, илегалниот шверц и трговија.