Во игра се четири имиња, а меѓу нив се поранешната министерка за животна средина, Каја Шукова и архитектот Мишко Ралев
СДСМ до крајот на тековниот месец ќе излезе со официјалното име на кандидатот за Град Скопје, вели лидерот на СДСМ, Венко Филипче. Тој рече дека во игра се четворица кандидати, меѓу кои архитектот Мишко Ралев, како и поранешната министерка за животна средина, Каја Шукова. Тој рече дека не би сакал да шпекулира пред време колкав број на гласови би добила неговата партија на претстојните локални избори, ниту пак со бројот на советнички места и градоначалници.
„Даваме се од себе да ги промовираме најдобрите кандидати, да ги увериме граѓаните дека нашите кандидати имаат кредибилитет и дека ќе работат чесно и транспарентно. На скопјани сакам да им порачам дека предлогот ќе биде човек што ќе обединува“,
изјави Филипче.
Во однос на Струмица, каде партијата одлучи довербата да му ја даде на претседателот на Советот на општината Марјан Даскаловски, наместо на актуелниот градоначалник Костадин Костадинов, тој вели оти Даскаловски имал поголема поддршка од партиското членство во однос на Костадинов. Токму поради номинацијата на Даскаловски, Костадинов го замрзна своето членство во партијата додека не се смени партиското раководство.
Кога станува збор за евентуална коалиција со партиите на Албанците во земјава, тој рече оти ќе се прават такви коалиции во мешаните средини, но врз повеќе основи како принципиелност, заемно почитување, компатибилност на кандидатите и луѓето кои живеат во овие општини.
„Со Ахмети не сум се сретнал, а со Таравари имавме средба пред неколку недели кога тој не беше кандидат. Побара поддршка и сега разговараме со нашите членови во општинската организација. Ќе ја донесеме најдорбата одлука“,
рече лидерот на СДСМ.