ДКСК утврдила три регулаторни ризици со сегашното дефинирање на процесот на платено политичко рекламирање во Изборниот законик, поради двосмислена терминологија, која може да се толкува различно
Државната комисија за спречување корупција (ДКСК), на својата 24. седница, го усвои Извештајот од антикорупциската проверка на одредбите од Изборниот законик кои се однесуваат на платеното политичко рекламирање.
Потпретседателката на ДКСК, Цвета Ристовска, најави дека Извештајот ќе биде доставен до надлежните институции со цел да се прецизираат одредени членови, да се дефинира поимот „учесник во изборна кампања“ и да се обезбеди рамноправен пристап до платеното политичко рекламирање за сите учесници.
ДКСК утврдила три регулаторни ризици со сегашното дефинирање на процесот на платено политичко рекламирање во Изборниот законик, поради двосмислена терминологија, која може да се толкува различно.
Едниот се однесува на членот 75-ѓ, став 1 каде, како што вели Ристовска, употребата на зборовите „може“ и „најмногу“ во контекст на минутите за рекламирање остава простор за различно толкување.
ДКСК предупредува дека „може“ не упатува на облигација.
„Зборот ’може’ не упатува на облигација, поради што при примена на законот, тој може поинаку да се толкува“,
рече Ристовска.
Поимот „најмногу четири минути“ Ристовска рече дека ја пропишува само горната граница на платеното политичко рекламирање, која не смее да се надмине, но не е пропишана долната граница.
Таа вели дека ова отвора простор одредени субјекти кои го применуваат законот, различно да го толкуваат и да го применуваат во двата случаи.
Ристовска нагласи дека ДКСК препорачува користење јасен и недвосмислен јазик за законските одредби за платено политичко рекламирање кај радиодифузерите во членот 75-ѓ став1.
Вториот регулаторен ризик, според неа, е нецелосна опфатеност на учесниците во кампањата.
„Првиот регулаторен ризик е во директно причинско-последична врска со вториот регулаторен ризик, кој се јавува поради нецелосна опфатеност на сите учесници во изборната кампања, кои, пак, се наведени во член 2, точка 14, од Поимникот на Изборниот законик, каде се наведува дека учесник во изборна кампања е овластено лице од политичка партија, коалиција или група избирачи кои ја организираат изборната кампања“,
рече таа.
Ристовска посочи дека законодавецот во членот 2, точка 14, и членот 75-ѓ, став 1, применил различни термини во наведувањето на учесниците во изборната кампања, поради што, кога станува збор за платеното политичко рекламирање, доколку се земе предвид членот 75-ѓ, став 1, не ги опфаќа сите оние што се дефинирани како учесници во Поимникот.
Поради тоа, Ристовска рече дека ДКСК препорача усогласување на членот 75-ѓ, став 1, и членот 2, точка 14, за да се обезбеди доследност и еднаков третман на сите учесници во изборната кампања
Третиот регулаторен ризик се однесува на неусогласеност на учесниците во кампањата со рекламниот простор на интернет-порталите.
Ристовска посочи и на судир помеѓу ставот 1 и ставот 13 од членот 75-ѓ, при што ставот 13 налага радиодифузерите, печатените и електронските медиуми да обезбедат рамномерен пристап за платено политичко рекламирање на сите учесници.