Па така, од полноќ новата цена на бензинот БС-95 ќе биде 79,50 денари за литар, бензинот БС-98 ќе се продава за 81,50 денари, а дизелот ќе чини 85,50 денари за литар
Од ноќеска на полноќ горивата ќе се продаваат по нови, повисоки цени. Со новата пресметка цените на горивата во просек се зголемуваат за 14,27 отсто.
Според одлуката на Регулаторната комисија за енергетика (РКЕ), цените на бензините БС-95 и БС-98, се зголемуваат за пет денари, додека дизелот ќе се продава поскапо за 14,5 денари.
Па така, од полноќ новата цена на бензинот БС-95 ќе биде 79,50 денари за литар, бензинот БС-98 ќе се продава за 81,50 денари, а дизелот ќе чини 85,50 денари за литар.
Со одлуката на РКЕ, од полноќ за 12,50 денари поскапува екстралесното масло за домаќинство и тоа ќе се продава за 82,50 денари за литар. За 7,044 денари за килограм се зголемува цената на мазутот, кој со одлуката на РКЕ од полноќ ќе се продава за 42,586 денари за килограм.
Од РКЕ објаснуваат дека ова поскапување е директна последица на движењата на светскиот пазар во споредба со претходната пресметка. Референтните цени на нафтените деривати бележат раст кај дизелот во просек за 36,134 отсто, а кај бензините за 13,384 проценти. Дополнително, на формирањето на цената влијае и повисокиот курс на денарот во однос на доларот.