Откако повеќе медиуми објавија дека се пробиени прашањата од тестовите на државната матура, Државниот испитен центар објаснува дека тестовите почнале да се споделуваат во вибер-групи откако почнало полагањето
Државниот испитен центар (ДИЦ) ги демантира објавите во некои медиуми дека се пробиени тестови од државната матура и појаснува дека имало споделување тестови во вибер-групи откако почнало полагањето на испитот.
„Тестовите од Државен испитен центар не се пробиени. Тестови не се пробиени до 10 часот кога почна тестирањето, тестови се споделени во вибер-групите од страна на членовите откако започна реализацијата на испитот. Државниот испитен центар нагласува уште еднаш дека тестот не е пробиен, туку бил споделуван откако е започната реализацијата на испитот“,
соопшти ДИЦ.
Од Центарот наведуваат дека како и во минатите години, пред почетокот на државната матура апелирале до сите матуранти и до сите што се вклучени во реализацијата на испитот да се почитуваат правилата за изведување на државната матура.
„Должност и обврска на ДИЦ е да ја спроведе матурата со подготовка на тестовите и нивна дистрибуција до училиштата. Тој процес е најпрофесионално извршен од ДИЦ“,
потенцира ДУЦ.
Матурантите денеска од 10 часот го полагаа вториот екстерен испит кој е изборен од предметите: Математика, Англиски јазик, Германски, Француски, Руски јазик, Филозофија и Естетика.