Министерството за ватрешни работи информира дека против тројца полициски службеници ќе биде поведена дисциплинска постапка поради непрофесионално полициско постапување кон новинарката на „Фокус“, Вики Клинчарова.
„Одделот за внатрешна контрола, криминалистички истраги и професионални стандарди при МВР постапувајќи по пријава од Здружението на новинари на Македонија за непрофесионално полициско постапување на 11.08.2022 кон новинарката на ‘Фокус’ В.К. од Неготино, а во врска со поплака од страна на жена од Неготино која на 08.08.2022 удрила малолетник со автомобил на улица ‘Маршал Тито’ во Неготино, за што новинарката објавила текст, утврди несоодветно извршување на работните задачи од полициски службеници. Поради тоа ќе бидат изречени дисциплински мерки односно ќе биде поведена дисциплинска постапка против тројца полициски службеници, согласно колективниот договор“,
соопштија од МВР.
Оттаму истакнуваат дека остануваат посветени на одличната соработка со новинарите и Здружението на новинари на Македонија (ЗНМ) и без никаква толеранција за вакви и слични случаи кои, како што велат, ќе бидат соодветно санкционирани.
Инаку, полициски службеници од Полициската станица Неготино, вчера дошле на домашната адреса на новинарката Клинчарова за да извршат службен разговор поради, како што кажале, предупредување поради поплака од жената која пред четири дена во центарот на Неготино со автомобил удри 11-годишно дете.
Реакција со осуда за настанот пристигна од ЗНМ од каде побараа одговорност од службениците и поведување на дисциплинска постапка.