Се работи за полицајци кои биле дел од Одделението за лично обезбедување на претседателот на РСМ. За време на настанот кој се случил на 22 март во скопско Дебар Маало констатирано е дека сториле потешко прекршување на работниот ред и дисциплина
Министерството за внатрешни работи покрена дисциплинска постапка против двајца полициски службеници кои лажно тврделе дека непрописно паркираното возило пред угостителски објект во скопско Дебар Маало е службено. Се работи за полицајци кои биле дел од Одделението за лично обезбедување на претседателот на РСМ.
Од Министерството дадоа хронологија на настанот кој се случил на 22 март годинава, а за кој јавноста дозна денеска по објавена видеоснимка на социјалните мрежи.
„По извршен увид во службената документација, констатирано е дека полицискиот службеник С.Н. од ОБПС Скопје, на 22.03.2025 постапувал по наредба за вршење дејност за непрописно паркирани возила. Од страна на граѓанинот С.Н., на телефонскиот број 192 било пријавено дека на улица ‘Орце Николов’, во близина на ресторан, непрописно било паркирано возилото ‘порше каен’“,
информираат од МВР.
Полицаецот С.Н. се упатил на локацијата во придружба на пајак-возило и двајца вработени во Јавното претпријатие за јавни паркиралишта на Општина Центар. Таму го затекнале непрописно паркираното возило и групата револтирани граѓани кои барале автомобилот да биде отстранет оттаму. Тогаш од угостителски објект во близина излегле две лица кои се легитимирале како полициски службеници, тврдејќи дека возилото е службено.
„Полицискиот службеник С.Н. им наредил веднаш да го отстранат возилото и да го паркираат на соодветно место, по што влегол во кабината на пајак-возилото со цел да провери дали возилото навистина е службено. Откако утврдил дека возилото не е службено и дека сè уште не е отстрането, на вработените од ЈП за јавни паркиралишта им дал наредба да го подигнат возилото, по што истото било пренесено во депото“,
додаваат од Министерството.
Таму друг полицаец направил записник за сторен сообраќаен прекршок и издал платен налог во кој како сторител на прекршокот е наведен С.К. (76) од Скопје. Сопственик на возилото, пак, е извесен М.Т. (48) од Скопје.
„Двете лица кои се претставиле како полициски службеници и тврделе дека возилото е службено, со патничко возило ‘форд мондео’ се упатиле кон депото. Полициските службеници од Одделот за внатрешна контрола, криминалистички истраги и професионални стандарди извршиле проверки за возилото ‘форд мондео’ и констатирале дека истото го управувале полициските службеници Т.Д. и И.С., распоредени во Одделението за лично обезбедување на Претседателот на РМ“,
додаваат од МВР.
За двајцата полицајци е констатирано дека сториле потешко прекршување на работниот ред и дисциплина.