Директорот вели дека во тек се сите потребни постапки за целосно расветлување на случајот, а болницата соработува со истражните органи. Другиот пациент што учествувал во настанот, како што дополни, во моментов е под постојан полициски надзор, согласно насоките од јавниот обвинител
Вчера во Психијатриската болница „Скопје“ во Бардовци се случи физичка пресметка меѓу двајца осуденици, а еден од нив го загуби животот по повредите здобиени со стаклено шише. И покрај лекарската интервенција, тој почина на Клиничкиот центар „Мајка Тереза“.
Денеска директорот на болницата, Хиса Авдулаи, изрази длабоко жалење и сочувство до семејството на пациентот што го загуби животот.
„Во свое име и во име на установата, изразувам длабоко жалење за настанот и упатувам искрено сочувство до блиските на починатиот пациент“,
изјави директорот Авдулаи.
Тој изнесе и дополнителни детали за случајот.
„Ја информирам јавноста дека во раните утрински часови на 5 август 2025 година, во Одделот за лекување на осудени лица при ЈЗУ Психијатриска болница ‘Скопје’, се случи несреќен настан со трагичен исход. Околу 00:50 часот дојде до физичка пресметка помеѓу двајца пациенти, при што едниот од нив, пациент на возраст од 62 години, беше повреден. Медицинскиот персонал веднаш интервенираше и повика Итна медицинска помош. Пациентот беше пренесен на Универзитетската клиника за ТОАРИЛУЦ, каде, и покрај укажаната лекарска грижа, му беше констатирана смрт“,
вели директорот Авдулаи.
Настанот бил веднаш пријавен во Министерството за внатрешни работи (МВР), а надлежните служби, вклучително и дежурен јавен обвинител, извршиле увид на лице место.
Директорот вели дека во тек се сите потребни постапки за целосно расветлување на случајот, а болницата соработува со истражните органи. Другиот пациент, како што дополни, во моментов е под постојан полициски надзор, согласно насоките од јавниот обвинител.