По средбата со раководството на тетовската полиција, на која биле разгледани сите околности и досегашните преземени мерки во врска со вчерашниот инцидент, Јанев изјави дека се преземаат активности за да се гарантира и испорача безбедноста, а на тетовци им порача оти полицијата е целосно мобилизирана
По вчерашната вооружена престрелка во Тетово во која едно лице беше убиено, а четворица повредени, директорот на Бирото за јавна безбедност (БЈБ) Александар Јанев, го посети Секторот за внатрешни работи Тетово.
По средбата со раководството на тетовската полиција, на која биле разгледани сите околности и досегашните преземени мерки во врска со вчерашниот инцидент, Јанев изјави дека се преземаат активности за да се гарантира и испорача безбедноста, а на тетовци им порача оти полицијата е целосно мобилизирана.
Додаде дека полицијата ги ставила во функција сите потребни служби со цел да бидат пронајдени сите инволвирани во вчерашниот инцидент.
„Нема да дозволиме стравот и насилството на поединци да ја нарушат секојдневната сигурност и мирот во заедницата. Истовремено, на сторителите и сите кои мислат дека со оружје можат да решаваат спорови и несогласувања им порачувам дека ќе бидат пронајдени, изведени пред лицето на правдата и санкционирани“,
порача Јанев.
Првиот човек на БЈБ упати апел до граѓаните во Тетово и ширум државата да соработуваат со полицијата и да пријавуваат со цел, како што рече, да се изгради средина без насилство и криминал.
Вчера околу 12 часот напладне во Тетово се случи вооружена престрелка во која едно лице го загуби животот, а четири лица, меѓу кои и малолетно девојче, беа повредени.