Во воведниот говор на денешното рочиште, адвокатката Сузана Јошевска-Анастасовска посочи на неколку моменти од обвинението, кое, според неа, го прават несериозно и незасновано на факти
Ова обвинение не нѐ става во судска постапка туку во замка, каде треба да се снаоѓаме во хаос кој настанот во Кочани го претвори во каталог, а не во потрага по правда, рече адвокатката Сузана Јошевска-Анастасовска, бранителка на поранешниот директор на Дирекцијата заштита и спасување (ДЗС), Аднан Џеферовски.
Во воведниот говор на денешното рочиште таа посочи на неколку моменти од обвинението, кое, според неа, го прават несериозно и незасновано на факти.
„Обвинението за Аднан Џаферовски, кој беше директор од 2017 до 2021 година ја нарушува теоријата за кривична одговорност. Обвинителството не бара кривично одговорни лица туку носители на т.н. системска вина. Не прибирале докази со кои истрагата би одела напред, туку се враќале назад за да создадат приказна што правно го напушта разумот. Овие обвинети не можеле ниту со телескоп да ја видат дискотеката. Не говорам за систем како апстракција, ниту еден системски пропуст не создава индивидуална поврзаност на дејството со последицата, а тоа го бара правото“,
рече бранителката на обвинетиот Џаферовски.
Во својата аргументација таа кажа дека објектот каде се наоѓал „Пулс“, што изгоре во март 2025 година, бил реконструиран во 2024 година, што, како што кажа, значи дека станувало збор за нов објект. За него до Дирекцијата за заштита и спасување не пристигнала никаква документација.
„Ќе поставам едно прашање. Што точно требало да преземе Џаферовски за да спречи пожар во 2025 година? Ќе наведам пример. Ако архитект проектирал зграда во 2017 г., а потоа зградата е реконструирана во 2024 г., кој требало да спречи нелегална реконструкција во 2024 година? Сигурно не Аднан Џаферовски“,
рече Јошевска-Анастасовска.
Таа во прилог на воведниот говор направи кратка видеопрезентација на Законот за заштита и спасување и законот за инспекциски надзор, кои како што кажа покажуваат дека директорот на ДЗС нема влијание на инспекторите туку за тоа е надлежен инспекцискиот совет.
„Станува збор за сложена материја, која и јас пред овој случај не ја знаев, а не ја знаел ниту обвинителот. Обвинението им става на товар нешто за што не се одговорни. Инспекциската служба не е под оперативна контрола на директорот, што е можеби и најважно. Тоа е така за да нема влијание врз инспекторите. За инспекцискиот совет ќе слушнете повеќе од мене понатаму во постапката. Инспекцискиот совет јасно управува со инспекторите, а не директорот. Ова е важно затоа што 99 отсто од доказите на обвинителството се годишните планови за административната работа на ДЗС. Обвинението го товари обвинетиот за пропуштен надзор, но не прави разлика меѓу редовен и вонреден надзор. Директорот не може да нареди вонреден надзор без пријава или претставка, а такво нешто за ‘Пулс’ немало“,
кажа адвокатката Јошевска-Анастасовска.
На крајот таа кажа дека не станува збор за случај во кој се спорни фактите, туку случај во кој правото е погрешно спроведено.
„Ако ова судење треба да покаже нешто, тоа е обвинението да не направи грешка“,
рече таа.
Обвинетиот Аднан Џаферовски кажа дека е принуден да се брани од обвинение кое е нејасно.
„Ја разбирам болката на родителите. Мене како човек совеста ми е апсолутно чиста. Јас бев само кратко време на таа функција, каде го вложив сето мое умеење и знаење за да ја подобрам неговата состојба. Ги разбирам амбициите на секој човек. Ги разбирам и амбициите на обвинителите, но не можам да прифатам тоа да го прават со рушење на мојот интегритет. Ќе се борам додека дишам“,
рече Аднан Џаферовски.