Додека подморницата не биде сертифицирана и тестирана не би требало да се користи за комерцијални тури за големи длабочини, го предупредува експертот по извршниот директор кој инаку е еден од петмината патници кои се наоѓаа во подморницата и загинаа
Предупредувањата за безбедност на потонатата подморница „Титан“ биле отфрлени како неосновани од страна на извршниот директор на компанијата „Оушнгејт“ Стоктон Раш, објави „Би-би-си“.
Ова го покажува неговата преписка преку електронска пошта со водечкиот експерт за истражување на морски длабочини Роб Мекалум.
Во пораките во кои увид имал „Би-би-си“, Мекалум му кажал на Раш дека потенцијално ги става во ризик своите клиенти и го повикал да не ја користи подморницата додека не биде прегледана и сертифицирана од независно тело.
На тоа Раш одговорил дека е „уморен од индустриските играчи кои го користат аргументот за безбедноста за да ги запрат иновациите“.
Тензичната комуникација во 2018 година завршила откако адвокатите на „Оушнгејт“ се заканиле со правна постапка.
Во пораките кои биле разменети, а кои ги објави британскиот медиум, се забележува дека извршниот директор изразува фрустрација од критиките што ги слушал за безбедноста на подморницата.
„Слушнавме неосновани предупредувања ’ќе убиете некого‘ токму многу пати. Тоа го доживувам како сериозна лична навреда“,
пишува тој.
Експертот Мекалум за предупредувањата зборува и во изјава за „Би-би-си“ каде вели дека повеќе пати барал од компанијата да побара безбедносен сертификат за користење на подморницата „Титан“ пред да почнат да ја употребуваат за комерцијални цели.
Во една од пораките до Раш тој вели:
„Додека подморницата не биде сертифицирана и тестирана не би требало да се користи за комерцијални тури за големи длабочини. Меѓутоа, нагласува медиумот, подморницата никогаш не била сертифицирана. Ве преколнувам да водите сметка за тестирањето и морските испитувања и да бидете многу, многу конзервативни. Колку и да ги ценам претприемништвото и иновациите, потенцијално можете да ја изложите на ризик целата индустрија“.
Извршниот директор Раш на оваа порака одговори бранејќи ја својата работа и рекол дека е „добро квалификуван да ги разбере ризиците и прашањата во врска со подводните истражувања“.
Раш е еден од петмината патници кои починаа во потонатата подморница која експлодираше. Компанијата „Оушнгејт“ тој ја основал во 2009 година, а на клиентите им нуделе шанса со „Титан“ да искусат патување во морските длабочини, вклучително и обиколка на потонатиот „Титаник“ по цена од 250 000 долари.
Од компанијата досега не ги коментираа мејловите што ги објави „Би-би-си“.