Експертите заклучија дека индиректно ќе има негативни ефекти на среден и долг рок, како резултат на ефектите врз економијата на Европската унија, со која имаме значителна трговска размена
Како ќе влијае воведувањето на царински давачки од администрацијата на американскиот претседател Доналд Трамп денеска анализираа учесниците економисти на дебатата „Финасиски трендови на глибалните пазари и ефектите врз локалната економија“, во организација на ЕОС Матрикс Македонија во рамките на платформата „Фајнанс толкс бај ЕОС“. Нивните прогнози се дека воведувањето на царини од 33 отсто за извоз на производи од земјава во САД нема да има значително директно негативно влијание.
Сметаат дека сме сведоци на создавање на нови глобални економски односи, каде нема простор на паника, туку поттик за темелна анализа и проценка на нови потенцијали и преструктуирање на економијата.
Катерина Бошевска, главен извршен директор на ЕОС Матрикс Македонија и ЕОС Косово и претседателка на Европската бизнис асоцијација смета дека воведувањето на царини од страна на САД кон другите е всушност дел од процесот на деглобализација што е започнат пред извесно време.
„Ефектите од оваа одлука по македонската економија ќе бидат пролонгирани, односно нема да ги почувствуваме веднаш. Но, ние треба да се фокусираме на нашите предности како економија и на редефинирање на даночната и фискалната политика“,
рече таа.
Според Никица Мојсовска-Блажевски, извршна директорка на Македонија 2025, воведувањето на царините ќе има индиректни влијанија, особено кај компаниите од САД, пред се, од дијаспората, кои инвестираа во земјава за да извезуваат во САД и ЕУ.
„Во таа насока неопходна е диверзификација на економијата, но и на пазарите. Треба да бараме нови пазари за извоз, особено на истокот и во Африка. Тоа е спасот за нашата економија. Но, важно е да се следи и транформацијата на германската економија, со цел да донесеме добри одлуки, каде можеме и ние да се вклопиме во таа слика“,
кажа таа.
За крај на глобализацијата, професорот Трајко Славески го оценува воведување на царини од страна на најголемата економија во светот.
„Сега ги гледаме последиците на еден процес кој започна во 2007 година, после големата светска криза, а се забрза со пандемијата од ковид, кога беа прекинати низа економски активности“,
рече Славески.
Посочи дека Македонија како мала економија нема да има големи директни ефекти од овој процес, но дека сепак, ќе има индиректни последици.
„Државата мора да направи анализа, а треба да се размислува и за намалување на царините на одредени стоки што доаѓаат од САД и да создадеме услови за ревизија на висината на царината за наши производи“,
посочи тој.
Економистите заклучија дека индиректно ќе има негативни ефекти на среден и долг рок, како резултат на ефектите врз економијата на Европската унија, со која имаме значителна трговска размена.
По обемот на трговската размена САД е на 24 место на листата на земји каде извезуваме домашни производи и полупроизводи.
Воведените царини од администрацијата на американскиот претседател Доналд Трамп, кои не ја одминаа ниту С Македонија, според Владата биле очекувана одлука, која, како што велат оттаму, нема да има големо влијание врз нашата економија.
Американскиот претседател Трамп на земјава ѝ воведе царински давачки од 33 проценти, што е половина од 65 проценти македонски царини за американски производи увезени во државата, што ги пресметала администрацијата во САД.