Во пресрет на амандманската расправа за ребалансот на Буџетот која треба да се случи попладнево, претседателот на Сојузот на синдикати на Македонија, Дарко Димовски, побара од претседателот на собраниската Комисија за финансирање и буџет, Бојан Стојановски, на денешната седница на Комисијата овој став да биде презентиран и апелира до пратениците да го усвојат pредлог-амандманот за зголемување на платите во јавниот сектор во износ од 2 086 денари
Претседателот на Сојузот на синдикати на Македонија (ССМ), Дарко Димовски, денеска се сретна со претседателот на собраниската Комисија за финансирање и буџет, Бојан Стојановски, на чија денешна седница, меѓу другото, треба да се разгледа и амандманот на ССМ за зголемување на платите во јавниот сектор.
Од ССМ повеќе пати потенцираа оти очекуваат сите пратеници да го поддржат нивниот амандман кој, како што соопштија, е чисто работнички и од егзистенцијално значење.
„Имавме во предвид дека е потребно амандманот да биде доставен до Собранието согласно Деловникот за да може да биде прифатен од страна на пратениците и поради тоа очекуваме сите пратеници да го поддржат амандманот на ССМ кој е чисто работнички и од егзистенцијално значење, а согласно процедурите доставен од пратениците од ВМРО-ДПМНЕ до Собранието, пред се поради тоа што соработката претставниците на работниците и претставниците на народот што претставува значајна алка за унапредување на работничките права и во иднина треба да биде пракса за надминување на сите предизвици“,
се наведува во соопштението на ССМ.
Сојузот на синдикати побара од Стојановски на денешната седница на Комисијата овој став да биде презентиран и да биде доставено писмото кое ССМ го достави до сите членови на Комисијата.
На средбата исто така присуствуваа и потпретседателите на Советот на ССМ, Иван Пешевски и Игор Ѓерасов како и пратеничката Дафина Стојаноска.
Во меѓувреме, генералните секретари на Меѓународната конфедерација на синдикати, Шаран Бароу и Европската конфедерација на синдикати, Лука Висентини дадоа целосна поддршка на активностите на Сојузот на синдикати на Македонија (ССМ) за зголемување на платите на вработените во јавниот сектор и за претстојниот генерален штрајк организиран од ССМ.
Бароу и Висентини посочуваат дека Северна Македонија беше пофалена за преземање на обврските за зголемување на минималната плата, но како што ги информирале ССМ, Владата во предлог за годишниот буџет не вклучила одредби за зголемување на платите за вработените во јавниот сектор, со што де факто го прекршила Законот за минимална плата од февруари 2022 година.
„Целосно ги поддржуваме барањата на ССМ до Владата да ја почитува својата посветеност и да ја зголеми платите во јавниот сектор за 2 806 денари нето-износ во согласност со Законот за минимална плата“,
пишува во писмото што генмералните секретари го испраќаат во име на 200 милиони членови од 163 држави дел од Светската конфедерација на синдикатите и 45 милиони членови од 39 европски држави дел од Европската конфедерација на синдикатите.
Повисоките законски минимални плати и посилното колективно договарање, како што се наведува во писмото, би го поттикнале економското закрепнување од ковид-19, а исто така би се справиле со предизвиците за економиите создадени од војната во Украина.