Владата на ВМРО-ДПМНЕ не ги заштити лозарите, ги остави „на цедило“, дозволи винарниците да манипулираат и со цените и со откупот на грозјето, обвинија од СДСМ
Бербата на винското грозје е при крај, а состојбата со откупот на терен е алараманта – по еден месец од почетокот на откупот над 20 милиони килограми грозје стои неоткупено, велат од СДСМ. На прес-конференција, Трајан Димковски од СДСМ обвини дека лозарите се оставени сами, без поддршка од власта, во исчекување дали родот ќе им биде откупен.
„Ако оваа количина не се откупи во следните неколку дена, грозјето ќе изгуби на квалитет, ќе изгуби во тежина. Дали е тоа целта на Владата на ВМРО-ДПМНЕ – грозјето под изговор дека е неквалитетно, како такво, да биде собрано по многу пониска цена. Затоа и јавно прашуваме дали е ова играта која ја води ВМРО-ДПМНЕ“,
вели Димковски.
Димковски обвини дека Владата не ги заштитила лозарите и дозволила винарниците да манипулираат и со цените и со откупот на грозјето.
„Манипулациите на власта одат до таму што сега на крај од бербата и откупот најавуваат дека наводно винарницата ’Вардар’ ќе го откупела вишокот грозје – над 20 милиони килограми. Дали владата знае дека оваа винарница последен пат откупувала во 2020 година, и тоа со капацитет од едвај 7 милиони килограми и дали воопшто е познато финансиското портфлио на оваа винарница? Го повикуваме премиерот Мицкоски да излезе на терен меѓу вистинските лозари да ги погледне лозарите в очи, и да понуди реално решение за откуп на грозјето“,
додаде Димковски.
На лозарите не им треба нов „Свед милк“, ново „Повардарие“, потребна им е вистинска поддршка и конкретни решенија, рече Димковски.
„Оваа влада покажа целосна незаинтересираност за една значајна земјоделска и извозна гранка како што е лозарството од која егзистираат над 11.000 лозарски семејства. Владејачкото мнозинство на ВМРО-ДПМНЕ застана против лозарите и не го поддржа предлог-законот на СДСМ за дополнителна финансиска поддршка за лозарите од три денари по килограм грозје и против укинувањето на одредбата која дозволува 8% намалување на откупната цена“,
порачаа од СДСМ.