Министерот за надворешни работи, Никола Димитров, на видеосостанок со евроамбасадорот Самуел Жбогар и амбасадорите на земјите членки на ЕУ порача дека е уверен оти во втората половина на 2020 година ќе почнеме со конкретна работа по однос на поглавјата за преговорите со Унијата.
На состанокот присуствувал и вицепремиерот за европски прашања Бујар Османи, а организацијата била на иницијатива на хрватската амбасада за одбележување на крајот на хрватското претседателство со Советот на ЕУ, со кој од 1 јули ќе претседава Германија.
„Преговорите со ЕУ се огромна шанса да создадеме европски услови за живот и работа за македонските граѓани. Уверени сме дека во втората половина на годината, нашите тимови ќе започнат со конкретната работа врз поглавјата односно кластерите на законодавството на ЕУ, како што е според новата методологија за водење на преговорите. Заедно со Амбасадорите на ЕУ разменивме мислења околу состојбата со коронавирусот на европскиот континент и изразивме надеж дека започнатото единство и солидарност во справувањето со оваа закана помеѓу ЕУ и регионот на Западен Балкан ќе продолжи и понатаму со уште поголем интензитет и координација, особено во претстојниот период кога полека ќе започнат да се отвораат границите за слободно патување на нашите граѓани и ќе биде потребно да се обезбеди економско закрепнување за нашите компании“,
рекол Димитров.
Димитров се заблагодарил за поддршката од Хрватска во чие претседателство се донесе и одлуката за почеток на преговорите. Хрватското претседателство во мошне тешки околности и големи предизвици успеа да ја одржи политиката за проширување високо на агендата на ЕУ и тоа е големо постигнување, истакнал Димитров.