Процесот на пристапување сам по себе не носи чуда. Ако не се искористи вистински, како алатка, со реформска работа дома, рече вицепремиерот за европски прашања, Никола Димиторв, во вечерашното гостување на Телма.
Тој смета дека без разлика дали ќе почнеме пристапни преговори со Европската Унија, треба да се фокусираме на реформската агенда дома.
„Мислам дека ако вака продолжи ЕУ, ние не знаме како ќе се одвиваат работите, можеби ќе успееме, можеби не, меѓутоа убаво би било да се фокусираме на реформската агенда дома, без разлика дали почнуваме процес или не. Треба да се фокусираме таму каде е најпотребно и најважно и да поканиме заинтересирани земји членки да ни помагаат во тој напор, земји кои предничат во одредена област“,
рече Димитров.
Според него, ќе биде лошо ако влеземе пак во очај или полуочај на чекање и додаде дека потребно е да држиме реформска кондиција.
„За тогаш кога Европа ќе овозможи европско решение што нема да оди на штета на европските принципи или на нашето право за самоопределување, да бидеме во добра кондиција“,
рече Димитров.
Процесот на пристапување, според него е обука и процес кој треба да трансформира и да не направи поевропски. Според него со последниот Извештај имаме големи скокови од 2017 година наваму.
„Има и добар напредок во некои области. Ќе треба да најдеме сила и не е тука само политиката, иако таа мора да биде најодговорна, како нација да најдеме сила да се фокусираме онаму каде ни треба очигледно напредок. Процесот на реформи не зависи само од Владата, туку и од образованието, администрацијата во смисла на капацитет, посветеност, судството, од медиумите“,
рече Димитров.
Во однос на тоа дали во министерствата има тимови за секој област за преговори со ЕУ, Димитров посочи дека има голем проблем со кадарот, и поради долгото чекање и поради тоа што платата за добар експерт и платата како консултант има голем диспаритет во корист на приватниот сектор.