Без поддршка, заштита и логистика од врвот на власта, шверцот на огромна количина дрога преку границата не би бил возможен, рече Димитријевиќ
Нема приведени, ниту осомничени, ниту одговори од власта, како пет тони дрога поминале преку македонската граница и кој ќе понесе одговорност, вели генералниот секретар на СДСМ Александар Саша Димитријевиќ. На денешната прес-конференција тој обвини дека без поддршка, заштита и логистика од врвот на власта шверцот на огромна количина дрога преку границата не би бил возможен.
„Од јавно објавените фотографии може да се види дека запленетата дрога во Србија била пакувана во големи картонски кутии со димензии 60 на 40 сантиметри, со по 4 до 5 килограми марихуана во најлонски кеси. Тоа значи многу пратки и многу возила, камиони. Пет, десет, можеби и повеќе шлепери или камиони требало да ја поминат границата. Како?“
вели Димитријевиќ.
Од Скопје до Табановце има 48 километри , со гранична и царинска контрола, посочи Димитријевиќ и повика на одговорност.
„Каде се камерите на „Safe City“? Каде е полиција? Каде се екипите на Мобилна царина? Каде се конторлите Мицкоски, Тошковски, Тарчуловски, Бобан Николовски, началници, раководители, инспектори, службеници. Кој се е вмешан и кој дозволил пет тони дрога да поминат преку граница?“,
додаде генералниот секретар на СДСМ.
Во однос на акцијата за заплена на канабис, Димитиријевиќ обвини дека МВР молчи за тоа како пет тони преминале преку македонската граница, но објавиле дека заплениле 40 тони канабис во земјава.
„Ако навистина се запленети 40 тони нелегално произведен и складиран канабис во Македонија, тогаш повторно одговорноста е кај власта и кај никој друг. Затоа што дозволиле нелегално да се произведува и складира марихуана изминатите две години. Кои институции затаиле? МВР, Здравство, Земјоделие, инспекции? Фактите се јасни. Одговорност мора да има за картелскиот скандал со дрога, од прв до последен, а тоа значи до врвот на власта“,
кажа Димитријевиќ.