Во дијаспората своето право на глас може да го остварат 2 569 избирачи, во 31 дипломатско конзуларни претставништва или конзуларни канцеларии
Денеска во земјава во тек е гласањето на болните и немоќни лица, затворениците и лицата кои издржуваат мерка притвор, како и лицата сместени во установите за вонсемејна грижа, внатрешно раселените и оние во дијаспората, информираат од Државната изборна комисија (ДИК).
Според ДИК, правото на глас во вториот круг од претседателските избори можат да го остварат вкупно 11 095 болни и немоќни лица, додека за парламентарните избори право на глас имаат вкупно 11 197 болни и немоќни.
Исто така, за вториот круг од претседателските избори денеска во 14 казнено-поправни установи можат да гласаат 2 147 затвореници, односно 2 140 за парламентарните избори.
„Вкупно 534 сместени во установите за вонсемејна грижа своето право на глас може да го остварат во вкупно 20 центри за претседателските и парламентарните избори и двајца пријавени гласачи евидентирани како внатрешно раселени лица имаат право да гласаат на двата вида избори“,
се вели во денешното соопштение од ДИК.
Денеска во 7 часот, во зависност од временска зона, гласањето започна и во дипломатско-конзуларните претставништва и конзуларните канцеларии во странство каде што се гласа само за претседателските избори.
Во дијаспората своето право на глас може да го остварат 2 569 избирачи, во 31 дипломатско-конзуларно претставништво или конзуларни канцеларии.