Претседателот на ДИК, Борис Кондарко, појасни дека формално истекува рокот за поднесување барања за набљудување, но оти додека има временски објективни услови за процесирање на барањата, тие ќе бидат прифатени
Државната изборна комисија (ДИК) попладнево во рамки на 142. седница донесе одлука за одобрување акредитации за меѓународни и домашни организации за набљудување на локалните избори закажани за 19 октомври.
За Здружението на граѓани „Цивил – Центар за слобода Скопје“ беа одобрени 51 набљудувач, за Европскиот парламент дополнителни 12, за Здружението на граѓани за зајакнување на демократските вредности „Триси консталтикс-Скопје“ – 36, за Државната изборна комисија на Молдавија – двајца, за ОДИХР – 98, за Здружението за развој на општествено социјални иновации „Вејк ап“ – 398 акредитации за набљудувачи, за Институтот за економски стратегии и меѓународни односи – Охрид 27, за Национални мрежи „Жените за жени“ – 20, за Амбасада на Република Албанија во земјава – четворица и за Британската амбасада во земјава беа одобрени 12 акредитации за набљудувачи.
„Секако, набљудувачите ќе го почитуваат кодексот на однесување и на правилата на самите избирачки места. Со ова нивно остварено право на набљудување, можат на целата територија на Република Северна Македонија каде и да сакат набљудувачите да појдат и да ги набљудуваат нашите локални избори за оваа година“,
рече членката на ДИК, Светлана Карапетрова.
Претседателот на ДИК, Борис Кондарко, појасни дека формално истекува рокот за поднесување барања за набљудување, но оти додека има временски објективни услови за процесирање на барањата, тие ќе бидат прифатени. Кондарко упати молба до заинтересираните што побрзо да достават барања за акредитации за набљудувачи.
„Нема да има никаков проблем и доколку вон рокот пристигнат дополнителни барања, ние во интерес на процесот и транспарентноста сите ќе ги одобриме и прифатиме. Но, замолуваме доколку има сѐ уште заинтересирани тоа да го направат што побрзо во наредните денови, да не оставаме за последните неколку дена пред изборите“,
рече Кондарко.