Од ДИК денеска потсетија и на упатството за гласање, кое ќе биде поставено пред секое гласачко место
Двојните избори утре ќе ги следат 1 303 домашни набљудувачи, 860 меѓународни набљудувачи и 83 странски новинари, информираа од Државната изборна комисија на денешната седница.
На седницата на ДИК беа одобрени и барања кои пристигнале за акредитации за набљудувачи за изборите за претседател и за изборите за пратеници.
Како што информира Бобан Стојаноски, член на ДИК, барањата се однесуваат на дополнување на веќе прифатени акредитации и станува збор за организацијата „Вејк ап“ со девет набљудувачи, ТВ Н1 од Белград со двајца новинари, телевизија Клан Косова со осум новинари, Амбасадата на САД дополнување со еден набљудувач, и ТВ Имеди – двајца новинари.
Стојаноски истакна дека до ДИК пристигнале уште 14 приговори за заштита на личното избирачко право.
„По нивната проверка во Секторот за Избирачки список во ДИК предлагаат 10 од нив да бидат прифатени, три да се одбијат и еден да се отфрли како беспредметен“,
рече Стојаноски.
На седницата Стојаноски потсети и на упатството за гласање, кое ќе биде поставено пред секое гласачко место. Гласањето, рече Стојаноски, се врши лично на гласачките места во државава.
„Избирачкиот одбор задолжително го прашува гласачот дали сака да гласа за двата вида на избори или сака да гласа само за еден вид на избори, односно дали сака да гласа за претседателски или за парламентарни или како што напоменав претходно и за двата избори одеднаш. Притоа, им го објаснува начинот на гласање и им овозможува на гласачите да гласаат. Гласачот може само еднаш да се појави на гласачкото место за остварување на своето избирачко право. Притоа, гласачот го приложува документот за лична идентификација, важечка лична карта или патна исправа, односно за претседателски избори 2024 година лична карта или патна исправа чија важност истекла од 24 јули 2023 година до 24 април 2024 година, а за парламентарните избори гласачот ќе може да гласа со лична карта или со патна исправа чија важност истекла во периодот од 8 август 2023 година до 8 мај 2024 година“,
рече Стојаноски.
Тој додаде дека гласачот ќе добие две гласачки ливчиња доколку се одлучи да гласа за двата вида избори или едно гласачко ливче за изборите за кои се одлучил да гласа. Потоа гласачот се потпишува во соодветниот извод од Избирачкиот список.
„Гласачот гласа сам, тајно зад гласачкиот параван. Гласачот гласањето го врши на тој начин што го заокружува редниот број пред називот, името на листата или редниот број на кандидатот со хемиско пенкало во сина боја. Превитканото гласачко ливче го става во соодветната гласачка кутија, бидејќи утре имаме двојни избори на секое избирачко место ќе има две гласачки кутии соодветно обележани. Притоа, секој гласач се задржува во избирачкото место онолку време колку што му е потребно за да го оствари своето право на глас без притоа да направи каков било застој во истото. На крај гласачот го подигнува документот за лична идентификација и го напушта гласачкото место“,
кажа тој.
Стојаноски објасни и дека на секое избирачко место ќе има седум члена на избирачкиот одбор и секој од нива ќе има посебна задача.
ДИК апелира до избирачките одбори и до општинските изборни комисии да продолжат да ги почитуваат законите и Изборниот законик, упатствата и правилниците донесени од страна на ДИК со цел успешно спроведување на двојните избори кои ќе се одржат во текот на утрешниот ден.
Претседателот на ДИК, Александар Даштевски, во саботата рече дека Државната изборна комисија (ДИК) е подготвена за претстојните претседателски и парламентарни избори на 8 мај. Првиот човек на ДИК вели дека броењето на гласовите ќе се одвива побрзо отколку во првиот круг, но ќе се објавува побавно бидејќи има две броења во кои ќе учествуваат сите заедно.