Излезеноста во Град Скопје до 13 часот, како што информираа од ДИК, изнесува 20,07 отсто
Излезеноста на гласачите на локалните избори до 13 часот на ниво на државата изнесува 20,17 отсто, соопшти Државната изборна комисија (ДИК).
Процентот е изведен од обработени 3 407 избирачки места, што е 97,70 отсто од вкупниот број. Како што може да се види на веб-страницата на ДИК каде што сукцесивно се објавуваат податоците, од 1 790 267 запишани избирачи на овие избирачки места, своето право на глас го оствариле 361 009 граѓани.
Општина со најголема излезеност е Чашка со 40,74 отсто. Потоа следуваат Новаци со 36,52, Македонски Брод со 34,02 проценти, Крушево со 33,88 и Вевчани со 33,76 отсто.
Најмала излезеност до 13 часот е забележана во Општина Врапчиште со 7,23 отсто, потоа се Гостивар со 11,66 и Центар Жупа со 11,97 отсто.
Како што беше соопштено на прес-конференцијата на ДИК, излезеноста во Град Скопје до 13 часот изнесува 20,07 отсто.
Во скопските општини, до 13 часот, најмногу гласале граѓаните на Карпош – 21,69 проценти, додека најмала е излезеноста во Шуто Оризари – 13,76 отсто.
Од ДИК информираа дека досега немаат никакви пријави за евентуални поголеми проблеми, нерегуларности или неправилности од општинските изборни комисии или од избирачките одбори.
На новинарско прашање за попреченост во работата на медиумските екипи во избирачкото место 2918 во Општина Чаир, од ДИК упатија апел до сите изборни органи да ги следат насоките дадени од Комисијата и да не ги попречуваат медиумите во вршењето на нивната работа.