Хрка вели дека не размислува за тоа кој бил мотивот на Вучиќ да ѝ се јави по една година
Дијана Хрка, мајката на Стефан Хрка, кој загина лани при падот на бетонската натстрешница на железничката станица во Нови Сад, продолжува со штрајкот со глад веќе осми ден.
Хрка вели дека не ги брои деновите, дека се чувствува добро и дека не се откажува од штрајкот.
Таа се осврна на фактот дека синоќа претседателот на Србија, Александар Вучиќ, изјави дека е подготвен да разговара со неа и дека неговата совест е чиста.
„Не ме повика директно. Ме повика преку медиуми, и тоа преку неговите медиуми“,
вели таа во изјава што ја пренесува српски Н1.
Вучиќ синоќа во изјава за РТС рече дека е подготвен да ја прими Дијана Хрка секогаш и во секое време и дека е подготвен да ја посети, но дека разговорот треба да се одвива без политичка претставаи без обиди за предизвикување инциденти.
„Тој рече – ‘ме навреди, но ќе ѝ простам’. Го прашувам претседателот – нè навредува сите веќе една година, се закани дека ќе нè уништи низ целиот свет, дали треба да му простам што рече за саботата дека ‘се игра некој натпревар’ – што да кажам на тоа? Дали треба да се навредам јас или тој? Нема да му простам“,
додаде таа.
Хрка вели дека не размислува за тоа кој бил мотивот на Вучиќ да ѝ се јави по една година.
„Нека размисли за тоа, тој е претседател, тој се меша во сè. Ако е подготвен да разговара и ако мисли дека сака да разговара, ќе дојде тука да разговара пред сите луѓе, пред сите медиуми. Ако се плаши од скандирање, тоа е негов проблем, а не мој. Тој ги собра луѓето на кои им плаќа и продолжува да им плаќа таму. Тие се мафијаши, тие се криминалци – и тој е повреден, а јас не сум повредена?“,
рече Хрка.
Веќе осми ден Хрка штрајкува со глад во близина на српскиот парламент, во шатор на улица и спие на палети бидејќи кога го започна штрајкот не ѝ дозволија да се приближи до зградата на народното собрание, каде што имаше намера да штрајкува. Тој дел е обезбеден од полицијата. Мајката на Стефан Хрка бара кривично гонење на одговорните за трагедијата во Нови Сад, ослободување на сите притворени студенти и распишување вонредни парламентарни избори.
Таа им се заблагодари на сите што доаѓаат да ја посетат, да ја поддржат, како и на оние што ја поминуваат ноќта во шатори до неа.
Дијана Хрка го започна штрајкот со глад на 2 ноември, по комеморативниот собир еден ден претходно во Нови Сад, одржан по повод годишнината од падот на бетонската натстрешница на железничката станица во Нови Сад и загинувањето на 16 лица.